Gibki maszkyt de lux (Ekspresowy deser de lux)

Tak po prŏwdzie¹, to je to tyż taki trocha deser dietetyczny, bo prawie w nim niy ma cukru. Niby de lux, ale idzie go zrobić po tōniu², choć wyglōndŏ jak ze blank³ wynŏkwianyj⁴ restauracyje 😉

Co potrza?

gorzkŏ szokolada

mascarpōne

dżym- nojlepi taki bez cukru abo świyże owoce, choć łozmrożōne⁵ tyż niy bydōm złe

Jŏ⁶ żech bez lato zrobiōł take dżymy, do kerych żech niy dŏwoł cukru, yno ôdparowywoł woda i przeciepowołech do krauzy⁷. I nic sie niy psuło. Yno przi wiśniach dołech 1-2 łeżki cukru na krauza i bōły idealne.

Wejście sie jako azjetka⁸ abo mały talyrzik, dejcie na niego szokolada i postŏwcie go na gorku ze wrzōncōm wodōm. Jak sie ta szokolada łozpuści⁹, to zrōbcie łeżeczkōm z ni jake fajne wzory. Ku tymu dejcie łeżka abo dwie mascarpōne, a na wiyrch dżym, owoce abo łozmrożōne i podgrzōne wiśnie. Deser baje pówytrawny, ale ze kawōm spasuje sie idealnie. Smacznego 🙂