Nolywka z kwiołtkōw maku (Nalewka z płatków maku)

Łajziōł1 żech na wiosna po polach i te maki polne tak gryfnie2 wyglōndały, że aże mie korciōło3, żeby coś ś nich4 narychtować5. A że lubia wynołkwiać6 roztomajte7 nolywki, to żech sie za nia wziōn8. Farba ôd ni je richtich9 fajnie czerwōno, a we smaku idzie delikatnie wyczuć mak, trocha goryczki, kero je przełōmano słodyczōm, a nad tym wszyjskim lołce10 smak limōnki.

Na trołwiynie po makōwkach we Wilijoł11 sie przido 😉

Co potrza?

litrowo krauza12 płatkōw ze maku

halba13

2 łeżki cukru

niypołno szklōnka wody

sok ze jednyj limōnki

Nojprzōd trza te płatki zalołć14 gorzołkōm15 i łostawić16 na 1-2-3… tydnie- przi nolywkach na tym piyrszym etapie to nojlepi ô nich na chwila zapōmnieć 😉

Potyn przecedźcie te płatki, możno je tyż wycisnōńć bez jako szmatka abo gaza. Sznaps wlyjcie do jaki flaszki, a płatki wciepcie do gorka, wlyjcie tam woda, dejcie cuker i 3 minuty to pod pokrywkōm powołrzcie17. Potyn wyłōnczcie i jak sie ochōdzi18, to zajś trza to przecedzić, połōnczyć tyn wywar z tym, kery my zlołli nojprzōd19, przelołć do flaszki, dolołć sok i… zajś20 na połra21 tydni ô tym zapōmnieć , a potyn to już yno… smacznego 🙂

 

1chodziłem

2pięknie

3korciło

4z nich

5przygotować

6wymyślać

7różne

8wziąłem

9naprawdę

10unosi się

11wigilię

12słoik

13pół litra wódki

14zalać

15wódką

16zostawić

17pogotujcie

18ostudzi

19najpierw

20znów

21kilka

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*