Pierogi richtich lyniwe

Już żech sam niyrŏz¹ pisoł, że lubia take dania, przi kerych niy trza za kans² łajzić po kuchni- no chyba, że to je jakŏ torta 😉 Rŏz³ za jaki czas, to by sie czowiek zjŏd ⁴ pierogōw lyniwych, ale jak do tego trza⁵ wyciōngać biyrkownica (stolnica) i zamarajsić⁶ pół kuchni, to sie zarŏzki odechciywo… i bez to żech prziszoł do tych pierogōw, kere sōm dlo tych… jakby to pedzieć⁷… barzi⁸ zgniōłych⁹ 😉

Co potrza?

3 jajca

1 szklōnka mōnki

250 g syra biołego

ździebko¹⁰ soli

i potyn jake tam już dodatki chcecie:

cuker, cynamōn, masło, bōłka tartŏ, miōd… fto co lubi

Dajcie żōłtka do jednyj miski, a biołka ubijcie ze solōm we drugyj. Do żōłtek przidzie syr i mogecie to wszyjsko razym fajnie wysztamfować¹¹. Niyskorzi¹² dejcie ku tymu mōnka, ubite biołka i fajnie to wymiyszejcie.

We gorku uwarzcie wody (mogecie tyż dać dō ni trocha soli). Wejście dwie łeżki, jednōm nabiercie masy (take pó łeżki), a drugōm sie pomōżcie, żeby to wciepnōńć do gorka z warzōncōm sie wodōm. Te pierogi niech sie ze 3-4 minuty powarzōm i mogecie je wyciōngać na talyrz. Potyn już yno łozpuszczōne¹³ masło, cynamōn… co tam chcecie i… smacznego 🙂