Wiśniōwka (Nalewka wiśniowa wiśniówką czasem zwana)

Robia roztomajte¹ nalywki, ale ta ze wiśni to je cojsik tak dobrego, że bez ni niy umia sie już forsztelować² mojego barku. Choć tak po prołwdzie to nawet niy wiym, czy mi idzie ło ta nalywka, czy ło te wiśnie, co to je potyn idzie wmōcić³. Joł ich niy pestkuja, bo wiadōmo, żech je trocha zgniōły⁴. Ja wiym, że tam w tym pestkach je tyn kwas, ale take trocha to nołs przeca niy zabije- przeca dzisiej to kaj sie czowiek niy łobrōci, to wszandy połno chymii⁵, a jeszcze nołs niy powalōło 😉

Jak żech już kejś pisoł, sōm dwie szkoły robiynia nalywkōw: jedni nojprzōd zasypujōm cukrym, a potyn gorzołkōm, a inksi na łopak⁶. Joł żech je z tych inkszych, bo nawet jak żech sie sprōbowoł narychtować jōm tak jak ci piyrsi, to wcale niy boła lepszoł.

Co potrza?

3 kg wiśni

0,5 litra szpirytusu

1 l gorzołki⁷

1,5- 2 szklōnek cukru

Umyte wiśnie wciepcie do srogi⁸ krauzy⁹, zalyjcie gorzołkōm i szpirytusym i zapōmnijcie ło nich na jake 2 miesiōnce. Jak Wōm sie ło nich spōmni¹⁰, to ślyjcie¹¹ gorzołka do jaki flaszki¹², a wiśnie po wiyrchu¹³ posujcie¹⁴ cukrym (tak na oko pó szklōnki). Jak puszczōm sok, to ślyjcie go do flaszki i zajś posujcie cukrym. I tak sie mogecie pobawić połra razy, a jak już bajecie widzieć, że tego soku je małowiela, to we jakim garcu pomiyszejcie to wszysko, co żejście ślywali z tyj krauzy do flaszkōw. Mogecie to przecedzić i wymiyszane wlołć do flaszkōw. Tera zajś niech to sie trocha przegryjzie, a Wy bez tyn czas mogecie sie rozkoszować tymi wiśniami. Same wiśnie, ze lodami, ze ciastkym… yno sie niy napiercie¹⁵ 😉 Smacznego 🙂