Edycja limitowano chipsōw ze Lidla

Chipsōw¹ normalnie niy kupuja- chyba, że mōm jaki dziyń słabojści abo przidōm jake modziki na bezuch² i jak im sie niy do czego do chrupania, to kit ze ôknōw mogōm powygryzać 😉

Marki Snack Day za bardzo niy znōm³ i żech sie pomyśloł, że jak majōm jako edycja limitowano, to je szansa, że bydōm dobre i idzie zaryzykować sprōbowanie. Co dobrego szło by pedzieć ô chipsach ze Lidla, to że niy majōm we składzie ôleju palmowego- u inkszych firmōw to sie jeszcze zdarzo- i niy ma tam we składzie żołdnych E, ani jaki inkszyj szkodliwyj chymii. Do modzikōw idzie cojsik takego zaryzykować.

Sweet Potato Chips- Spring Herbs and Parmesan. To chipsy ze batatōw, słodkich kartołfli⁴, a sam jako dodatki sōm zioła i parmezan.

100g za 4,99 zł. Tōnio⁵ to niy jest, ale za edycja limitowano i bataty to trza już zapłacić trocha wiyncyj. Batat je mało wyraźny we smaku i i trza by go jako przełōmać. Sam⁶ mioł to robić parmezan i zioła (pietruszka i koperek), ale o ile parmezan idzie wywōniać⁷ i trocha go czuć przi jedzyniu, to tych ziołōw prawie niy. Srogi⁸ plus za chrupkość, bo take frytki ze batatōw to nojczyńściyj sōm miynke, ale tyn smak to mie do kōńca niy przekōnoł. Czegojsik sam brakuje i wiyncyj jak 3 punkty na 5 bych im niy doł.

Extra Crunchy Crisps- Honey and Mustard Flavour. Chipsy ô smaku mostrichu/zynfu⁹ i miodu. W składzie tego miodu je yno 0,1 %, a do tego sōl, cuker, mlyko, gorczyca, cebula we proszku i- czego zabraknōńć niy mōgło- kartołfle 69 % i olyj 26 %.

125 g za 3,99 zł.

Fajnie wōniajōm, idzie tam wyczuć tego kartołfla- co niy we wszyjskich chipsach je normalne- wyraźne we smaku i fajnie pikantne. Niy wiym, skōnd we smaku czuć ôcet, ale bez to przipōminajōm trocha angelske chipsy. Jedna kōmratka ô nich pedziała: „nojprzōd czuć słodycz miodu, a potyn ôstrojść musztardy”. Idzie je dojś szybko wciōngnōńć i myśla, że to take mocne 4,5 na 5 punktōw. Te pó bych im wziōn za kōnzystyncja, bo niby fajnie chrupiōm, ale potyn sie niy rozpuszczajōm we gymbie, yno troszka sie zbijajōm w tako trocha twardszo masa. Mimo to bych je mōg zajś kedy kupić- keby niy te kalorie 😉