Ryba we grzibowyj zōłzie (Ryba w grzybowym sosie)

Jak żech pedzioł,¹ jake danie chca narychtować, to moja Kobiyta² trocha krynciōła³ nosym, ale jak już to miała na talyrzu, to zaroski⁴ zmiyniōła zdanie. Ryba je delikatnoł, a do tego arōmatyczne grziby we śmiytōnkowyj zōłzie… pycha- no, chyba że ftojś⁵ niy lubi rybōw 😉

Co potrza?

1 kg ryby – joł żech doł dorsza, ale mōgłyby sam być i inksze zorty⁶

dwie gorście⁷ suszōnych grzibōw- nojlepi prawdziwkōw

1 srogoł⁸ cebula abo 2 mańsze

2 łeżki masła klarowanego

150 śmietōnki

łeżeczka tymianku

łeżeczka majeranku

pieprz i sōl

natka pietruszki

trocha mōnki kartoflanyj do zagynszczynia zōłzy

Grziby opukejcie⁹ i uwołrzcie¹⁰– dejcie¹¹ ale yno tyla wody, coby przikrōła grziby.

Na maśle zeszklijcie pokrōnoł¹² cebula, dodejcie ryba, pokrōne grziby razym ze tym wywarym i prziprawy. Ta ryba potrzebuje yno połra minut i bydzie fertich. Pod kōniec przidzie jeszcze śmiytōnka, ale nojlepi jōm pryndzyj¹³ trocha zahartōwac tōm zōłzōm, żeby nōm sie niy zetła¹⁴. Keby Wōm sie ta nasza zōłza razym ze śmiytōnkōm zdała¹⁵ trocha za rzołdko, to mogecie rozfyrlać¹⁶ we zimnyj wodzie trocha mōnki (pszynnyj, kartoflanyj abo i ze majsu¹⁷) i jōm zagyńścić. Pod kōniec jeszcze rołz mogecie jōm trocha doprawić i smacznego. Joł żech jōm jołd ze dzikim ryżym, ale tak po prołwdzie¹⁸ to sam bydzie wszyjsko fajnie ku tymu¹⁹ pasować.