Kura we bazyliowyj zōłzie (Kurczak w sosie bazyliowym)

Niy ma co sam tera pisać elaboratōw¹, ale bez jaki cufal² wyszoł mi z tego richtich³ fajny recept⁴… i szlus⁵ 😉

Co potrza?

1 kg kurczaka (joł żech mioł piersi, ale idzie tyż dać filety ze podudzi)

2-3 gorście⁶ listkōw bazylii

1 gorść listkōw limonki kaffir (abo skōrka ze citrōłny)

łeżka mostrichu/zynfu⁷

5 łeżek oliwy

5 łeżek oleju rzepakowego

pó szklōnki biołego wina (wytrawne abo pó wytrawne)

ździebko⁸ chili

zōmbek czosku

trocha mōnki do zagynszczynia zōłzy (joł zech doł ryżowo)

sōl i pieprz

Kurczaka we srogich⁹ kōnskach¹⁰ żech podpiyk na prawie suchyj patelni (yno ździebko oleju abo masła klarowanego do natłuszczynia i wtedy niy bydzie tak pyrskać¹¹). Bazylia, liście limōnki, inksze¹² prziprawy i wino zblyndujcie. Wciepcie to wszyjsko ze kurczakym do jakego gorka i niech sie to aby ze godzina pomału¹³ powarzi¹⁴. Na patelnia po podpiykaniu mogecie wlołć trocha wina, żeby zebrało te przilepiōne kōnski miysa i dolyjcie to niyskorzi¹⁵ do naszyj zōłzy.

Jak już miyso bydzie miynke, to je wyciōngcie¹⁶, zōłza mogecie trocha odparować i zagyńścić (mōnka rozrōbcie we zimnyj wodzie, wlyjcie do zōłzy i uwołrzcie). Terozki już yno ôstało¹⁷ jedzynie. Tako kura pasuje fajnie do klōzek¹⁸, nudli¹⁹ abo ryżu, choć joł żech jōm podowoł ze szałołtym²⁰ ze brokuła i kartołfli²¹. Smacznego 🙂