Słodkoł tarta ze iberaszōngym (Tarta z niespodzianką)

Niy czekejcie, że tam bydzie¹ szło znojś² kupōn³ na telewizor abo złoty pieszczōnek⁴, choć jak sami cojsik takego tam skludzicie⁵, to sie bydzie Wasz byzuch⁶ radowoł. Jo sie zarozki⁷ na poczōntku prziznōm⁸, że jak żech rychtowoł⁹ te tarletki (małe tarty), to bōło¹⁰ ciepło, a do tego jeszcze mieli przijś gojście i żeby my sie niy uwarzyli¹¹ we miyszkaniu, to żech sie kupiōł gotowe spodki do tarletkōw. Kebych¹² mioł to robić sōm, to bych zrobiōł jedna srogoł¹³ tarta, bo za kans¹⁴ smolynia¹⁵ bych mioł z tymi małymi pyrtkami.

Co to za ibaraszōng? To bydōm trzi warstwy rozpusty: piyrszoł to szokolada ze mascarpōne, potym przidzie kōnfitura ze aprikołzōw¹⁶, a na wiyrch kokosowy pudding. Niy je to za słodke, wartko sie robi, a potyn sie idzie rozkoszować fajnymi maszkytami¹⁷. A jeszcze jak aprikołzy bydōm kwaskowate, to słodke bydzie fajnie przełōmane.

Co potrza?

Spodek:

200 g mōnki¹⁸ pszynnyj

125 g masła

3 żōłtka (biołka sie zamrojście- przidajōm¹⁹ sie kedy idziyj na beza abo makrōłny)

3 łeżki cukru

ździebko²⁰ soli

Warstwy:

250 g mascarpōne

100 g szokolady deserowyj (gorzkyj)

20 dkg aprikołzōw

400 ml mlyka kokosowego

pudding waniliowy

Kebyście chcieli sie zrobić ta wersja dlo barzi robotnych, to rozgrzyjcie bratruła²¹ na 200 stopni. Wszyjske składniki spodka wciepcie²² do jaki miski i wyrōbcie. Niyskorzi niy bydymy tego dołwać do żołdnyj²³ lodōwki na połra godzin, yno zaroz wyklejymy tym forma na tarta. Kebyjście chcieli, to mogecie tyż te ciasto sie rozwałkować miyndzy dwōma papiōrōma do pieczynioł, a potyn yno przeciepnōńć je do formy. Przed pieczyniym mogecie je tyż trocha podzióbać widołkōm²⁴. Wrojście²⁵ tyn spodek do pieca na 20-25 minut, żeby sie fajnie na złoto przibrōnołciōł²⁶. Jak już baje upieczōny, to niech sie ochōdzi i mogecie dołwać do niego nasze warstwy.

Jak mołcie kupiōne gotowe tarletki, to poła²⁷ roboty już za Wami i mogecie sie zarozki brać za rychtowanie piyrszyj warstwy.

Ôzpuśćcie²⁸ szokolada we jaki misce nad gorkym ze wrzōntkym, a potyn wymiyszejcie ze syrkym mascarpōne i mogecie kłajś²⁹ na tarta/ tarletki.

Aprikołzy wrojście na chwila do wrzōntku, ôbiercie³⁰ im skōry, wyciepcie³¹ pestki i zblyndujcie. Potyn przelyjcie ta masa na patelnia i niech sie ôdparuje (jak aprikōłzy bydōm za kwajśne, to mogecie dociepnōńć do tego trocha cukru). Jak już ta kōnfitura bydzie fajnie gynstoł, to rozsmarujcie jōm na warstwie ze szokoladōm.

Terozki ôstoł³² już nōm³³ yno³⁴ pudding. Uwarzcie³⁵ we gorku mlyko kokosowe. Do jaki szolki³⁶ wlyjcie 150 ml zimnyj wody, ôzpuśćcie tam pudding i dejcie do warzōncego³⁷ sie mlyka. Miyszejcie, aż to wszyjsko cuzamyn³⁸ zawrze³⁹. Przelyjcie tyn pudding na wiyrch tarty i za chwila mogecie Wasz byzuch wołać na kafyj⁴⁰. Smacznego 🙂