Syrnik czorno-bioły (Sernik czarno-biały...choć nie do końca ;) )

Wielkanoc coroz to bliżyj i trza sie pomału^¹ brać za jedzynie, kerego^² niy moge zabraknōńć przi świōntecznym fajrowaniu^³. Za starego piyrwy we moji familiji niy bōło, jakby to dzisiaj pedzieć^⁴, za kans^⁵ „tradycji kulinarnych”. We Wielki Piōntek sie zjedli śledzia, a na niydziela bōły kroszōnki, szinka i kołocz. Tera sie to trocha zmiynio i nawet w tych chałpach, kaj^⁶ piyrwy ło świyncōnce ani niy słyszeli, to tera we Wielkoł Sobota cisnōm^⁷ do kojścioła ze koszyczkym. A jak idzie o słodkojści, to jak czowiek sie pomyśli ło Wielkanocy, to zarozki moł we łebie^⁸ syrnik. Możno to i dō nołs prziszło ze Rusyji^⁹, kaj sie na te Świynta zawsze jy Pascha? Syr i jajca sōm symbolym łod nowego życia, a te wszyske bakalie to richtig^¹⁰ luksus i czowiek zarozki wiy, że to niy je byle jaki dziyń. Tyn mōj syrnik niy bydzie za wymyślny i bez to nawet te ludzie, co to im niy nojbliżyj do pieczynioł, dajōm sie śnim^¹¹ rada.

Co potrza?

Czorne:

40 dkg mōnki pszynny

2 łeżki cukru

1 łeżeczka proszku do pieczynioł

200 g masła

2 łeżki kakao

4-5 łeżek śmiytōnki (12 abo 18%)

kapka arōmatu rumowego

Biołe:

1 kg syra (nojlepi ze wiaderka, bajecie mieć mani^¹² roboty)

połra łeżek śmiytōnki- idzie pedzieć, że mogecie sam dać reszta śmiytōnki, jak żejście mieli akurat take małe pudełko

1 łeżka masła

25 dkg cukru

2 łeżki kartofylmyjlu^¹³

4 jajca

1/3 szklōnki rodzynek

1/3 szklonki pokrōnych suszōnych moreli

2-4 łeżek rumu

Nojprzōd^¹⁴ sie zalyjcie te rodzynki rumym- nojlepi kebyjście sie to zrobiyli dziyń pryndzyj.

Tera wszyske „czorne” składniki wciepcie do jaki miski, zagniyćcie, zróbcie sie z nich 2 kulki i wrojście na godzinka do zamrażalki. I nim sie wejźniecie za dalszoł robota, to mołcie kans czasu na kafyj abo i na klachy^¹⁵ ze jakōm kōmratkōm^¹⁶ 😉

Jak już we zamrażalce te nasze „czorne” ciasto bydzie fajnie twardōńć, to sie oddzielcie biołka łod żōłtek- żōłtka dejcie do jaki wiynkszyj miski, a biołka we jaki mańszyj utrzaskejcie^¹⁷ na sztajfno^¹⁸ piana. Do żōłtek dejcie cuker i wymiksujcie. Niyskorzi^¹⁹ dejcie tam śmiytōnka, masło, kartofylmyjl i syr. Jak już te wszyske składniki sie wymiyszajōm, to wciepcie tam piana i za chwila tyż te rodzynki i morele.

Rozgrzyjcie piec na 200 stopni i przigotujcie sie forma. Mogecie sie tyn syrnik dać i do taki kwadratowyj formy- wtedy bajecie^²⁰ mieć go trocha niższy- abo do normalnyj tortownicy.

Wyciōngcie ze zamrażalki te „czorne” ciasto, wejście sie jake tarło^²¹ i na tych srogich^²² łoczkach potrzyjcie na spodek formy jedna kulka. Na to wylyjcie syrnik, a na wiyrch^²³ zajś przidzie ta potarto kulka „czornego”.

Wrojście^²⁴ go do pieca nojprzōd na 10 min na 200 stopni, a potyn sie zmniyjszcie tymperatura na 180 i niech sie łon tam siedzi ze 40 abo 50 minut. Pod kōniec patrzcie, żeby sie niy przipołlōł^²⁵, bo przeca^²⁶ kołżdy piec je inkszy i trza dołwać pozōr^²⁷. Jak byjście tyn syrnik robiyli we tortownicy, to na pewno bydzie musioł siedzieć we piecu chwila dużi.