Torta łod Kaufmanna (Tort skromności ;) )

Jak niy mołcie ciyrpliwojści¹ do pieczynia, to ani tego niy czytejcie 😉 To niy torta z tych, co to sie pieke biszkopt, wciepnie na niego trocha dżymu, ślagzana² i fertich³. Jak już fto jednak poświyńci te połra godzin, to efekt je richtig⁴ zaskakujōncy. Ciymno szokolada, beza, mascarpōne i śliwki moczōne we kōniaku… Robiōłech go 2 razy i za kołżym razem goście go raz-dwa wmōciyli⁵ 😉

Co potrza?

Ciymny biszkopt:

5 jajec

4 łeżki⁶ mōnki pszynny

1 łeżka kartofylmyjlu⁷

2 łeżki kakao

5 łeżek cukru

2 łyżeczki proszku do pieczynia

Beza:

6 biōłek

1,5 szklōnki cukru

3 łeżki kartofylmyjlu

2 łeżki likieru cytrynowego abo kōniaku

trocha soli

Kryjma:

500 g mascarpōne

2 gorzke szokolady (po 100 g)

Ślagzana:

125-150 ml śmiytōnki 30 abo 36 %

1 łeżka pudecukru

1 śmiytanfix

Śliwki:

100 g suszōnych śliwek bez pestkōw

keliszek kōniaku abo brandy, abo whisky

keliszek wody

Pieczynie trza sie rozłożyć na 2 dni- nojprzōd biszkopt i beza, a na drugi dziyń kryjmy.

Na samym poczōntku zamoczcie sie tyż w kōniaku z wodōm pokrōne śliwki- jakby co, to mogecie tyż dać 2 keliszki kōniaku i niy dołwać wody.

Tera biszkopt. Rozgrzyjcie sie piec na 165 stopni i przigotujcie sie tortownica- jak mołcie⁸ tako zamykanoł, to na ta dolnoł czyńść mogecie sie dać piapiōr⁹ do pieczynioł.

Biołka łoddzielcie od żōłtek i przesiyjcie sie ta mōnka i kakao. Do tych biōłek wciepcie¹⁰ trocha soli i ubijcie. Pod kōniec wsypcie tam cuker i dalyj ubijejcie. Po jednym¹¹ wciepujcie żōłtka, potyn¹² zmniyjszcie¹³ łobroty¹⁴ i wsujcie¹⁵ tam ta mōnka, kakao i proszek. Ubijejcie jeszcze trocha i wlyjcie¹⁶ to do ty¹⁷ tortownicy- i rajn¹⁸ do pieca na 35-40 minut. Jak bydziecie jōm wyciōngać, to odwrōćcie ta forma do gōry dnym i ściepnijcie¹⁹ na stōł (ze 20 abo i 30 cm). I niech sie łona²⁰ tera trocha łodpocznie.²¹

Beza. Ubijcie sie biōłka na beza (wciepcie tam trocha soli). Potyn dejcie tam cuker i ubijejcie, aż sie rozmiyszoł. Na sōm kōniec wmiyszejcie kartofylmyjl i wlyjcie likier abo kōniak. Przigotujcie sie 2 blachy, wyłōżcie na nie papiōr do pieczynioł i odrysujcie na nim 2 kōłka wielkości dna tortownicy. Tera na kołżde kōłko wyłōżcie po pó²² ubityj masy i rozsmarujcie. Na tym kōnsku, kery pódzie na wiyrch, mogecie łeżkōm postawiać take szpice- fajnie bydōm wyglōndac po upieczyniu. Rozgrzyjcie bratruła²³ na 180 stopni i wrojście²⁴ tam obydwie blachy- nojlepi we piecu ze termoobiegym. Jak już bydōm we środku, to zmniyjszcie na 100 stopni i niech to tam posiedzi 3 godziny. Po jakimś czasie mogecie tyż na chwila otwiyrać leko tyn piec, żeby uciykła para- połra razy.

A tak minōł dziyń piyrszy.

Na drugi- dziyń fajeru²⁵– przekrejcie biszkopt na pó. Mogecie go tyż leko nawilżyć kōniakym zmiyszanym ze wodōm, yno żebyjście sie potym tōm tortōm niy naprali²⁶.

We gorku abo misce nad wrzōncōm wodōm rozpuście sie te 2 szokolady. Do miski dejcie mascarpōne i zmiksujcie ze łozpuszczōnōm szokoladōm- kryjm je fertich.

We inkszyj misce ubijcie śmiytōnka i dejcie do ni łeżka pudecukru i śmiytanfix.

Teraz sie bierymy do nojważniyjszyj roboty. Na spodek patery abo talyrza idzie placek biszkoptu. Na niego smarujecie połowa kryjmy z mascarpōne i na to wciepujecie połowa śliwek.

Tera przidzie beza, na nia ślagzana i drugi placek biszkoptu. Na biszkopt reszta kryjmy, śliwki i na sōm wiyrch beza. Wrojście to na chwila do lodōwki i… na stōł. Smacznego 🙂