Ajerkuchy na drożdżach (Naleśniki na drożdżach)

Ajerkuchy ludzie rychtujōm¹ ze proszkym do pieczynia, natrōnym², gazowanōm wodōm mineralnōm, a mie jakosik ostatnio spodobały sie take na drożdżach. Trza je narychtować trocha pryndzyj, ale dziynki tymu mōmy chrupiōnce ze wiyrchu i miynke driny³ placki, kere⁴ idzie nadziywać, czym yno Wōm sie zachce.

Co potrza?

Ajerkuchy zawsze robi sie tak barzi na ôko⁵ 😉

1-2 jajca

ździebko⁶ drożdży (1-2 dkg)

troszka cukru

pyrszczka⁷ soli

mlyko i mōnka- sam trza już tak na wyczucie, nojważniyjszŏ je kōnsystyncja tego ciasta, niy moge być ani za gynste, ani za rzŏdke⁸

Nojprzōd ubijcie we misce mikserym jajco, potyn dejcie tam drożdże, cuker, sōl, połra łeżek mōnki i mlyko i pomiksujcie to. Jak bydzie za gynste, to dejcie⁹ wiyncyj mlyka, jak za rzŏdke- wiyncyj mōnki. Przi tych ajerkuchach na drożdżach to lepi narychtować je barzi rzŏdke, bo jak drożdże napocznōm robić, to nōm to trocha zgynstnieje. Nojważniyjsze to niy dŏwać za zimnego mlyka i ôdstawić ciasto aby na pó godziny. Ône bydzie potyn wyglōndało choby ubitŏ śmiytōnka. Te naleśniki bydōm trocha rubsze, ale i barzi puchate.

Idzie zjejś je ze żōłtym syrym i szinkōm, szpinatym abo i na słodko… sam już mogecie poszaleć. Te na ôbrŏzku sōm ze miyszankōm potartych syrōw, rucolōm, guacamole¹⁰, ôgōrkym, tōmatami¹¹ i winegretym¹².

Smacznego 🙂