Dorsz we kokosie (Z bananowym sosem ;) )

Na poczōntku chciołech wszyskim tym, co niy lubiōm wiórkōw kokosowych (kōłkōsraszpli), pedzieć, żeby sie niy nerwowali, bo w tym daniu ich niy znojdōm. Te ciasto, we wtorym je tōnkanoł ryba, zrobiōłech ze mlyka kokosowego, a to je całkym inkszo inkszość¹. A wiym, co gołdōm, bo moja Baba niy lubi kōłkōsraszpli i inkszych rafaelo-podobnych rzeczy, ale za to dania ze mlykym kokosowym jy ze smakym, a nawet to, co je driny² we kokosie, choć jak dō mie to je prawie to samo, jak te suche wiórki. Co by szło na to pedzieć: kobiyty… 😉

Co potrza?

0,5 filetu ze dorsza

trocha mōnki pszynnyj

puszka mlyka kokosowego

ze 3 łeżki mōnki kukurydzianyj (abo, jak niy mołcie, to moge być i pszynno)

1 jajco

1 łeżeczka garam masala

ździebko chili

łolyj³ do pieczynia

Zōłza:

2 banany

połra łeżek jogurtu greckego

połra gołōnzkōw kolyndry

zaft ze jednyj citrōłny

Na poczōntek sie zrōbcie ta zōłza. Wszystke składniki wciepcie do blyndera abo zmiksujcie tōm kōńcówkōm do blyndowania we jaki misce i fertich⁴. I zarozki⁵ tyż moge pedzieć, że nasza kōmratka, co to tyż jadła, niy lubi kolyndry, a zōłza ji⁶ smakowała i nawet sie ździwioła, że je tam ta kolyndra driny.

Ryba moł być i bez ości, i bez skōry. Jak już jōm łobierecie- te kupne filety to nojlepi jeszcze sprołwdzić, żeby sie potyn jaki bezuch⁷ niy udołwiōł⁸ łościōm- to pokrejcie jōm na mańsze kōnski (np.: 5 cm na 2 cm). Do jaki miski wbijcie jajco, dejcie mlyko kokosowe, mōnka kukurydzianoł (napisołech 3 łeżki, ale jakby te ciasto bōło za rzołdke⁹, to dociepcie¹⁰ ji trocha wiyncyj), prziprawy i wymiksujcie.

Jak zrobić sie garam masala, znojdziecie sam: http://chopwkuchni.pl/?p=315 .

Rozgrzyjcie sie w jakim gorku łolyj- chyba, że mołcie frytkownica. Wysujcie¹¹ sie na jaki talyrzik trocha mōnki pszynny, łobtoczcie w ni kołżdy kōnsek ryby, potyn tōnknijcie we cieście i do łoleju. Jak sie fajnie przibrōnołci¹², to je fertich¹³ i idzie jeszcze ta ryba yno oblołć zōłzōm i wmōcić¹⁴ 😉

Smacznego 🙂