Czytołech kajś1, że we Niymcach majōm sauerbraten2 ze miysa wołowego i tak mie to jakosik zainspirowało, że już żech pŏra razy roztomajte miysa rychtowoł we kwajśnyj marynacie. Ôni to robiōm ze ôctym, ale żech sie pomyśloł, że przeca3 kans lepszŏ bōłaby kwaska (woda ze ôgōrkōw kiszōnych abo kapusty). Wiym, że niyftorzi jōm całŏ wypijōm, ale keby Wōm trocha ôstało, to zawsze mogecie sprōbować poeksperymyntować.
Co potrza?
kōnsek miysa (wieprzowego abo wołowego)
kwaska ze ôgōrkōw kiszōnych abo kapusty
trocha pieprzu
trocha śmietōnki
mōnka do zagynszczynia zōłzy (nojlepi kartŏflanyj4)
Tyj kwaski trza mieć tyla, żeby aby do połowy przikrōła miyso. Miyso trza aby dziyń pryndzyj zamoczyć we tyj wodzie i potyn, jak Wōm sie spōmni5, to mogecie je tyż przewrōcić na drugŏ strōna. Miyso fajnie przechodzi tym arōmatym i do tego bez ta kwajśnŏ woda miynknie.
Potyn je wyciōngcie ze kwaski- niy wylywejcie ji, miyso ôpiyczcie ze kŏżdyj strōny na tyglu6 i niyskorzij duście we tyj wodzie bez pŏra godzin na małym ôgniu. Im dużyj, tym barzi zmiynknie.
Niyskorzyj wyciōngcie miyso na jaki talyrz i już yno trza narychtować zōłza7. Nojlepi nojprzōd całŏ woda ze warzynia przecedzić. Potyn dejcie ku tymu trocha śmiytōnki, łozfyrlanyj8 we zimnyj wodzie mōnki i napocznijcie ta zōłza podgrzywać- cołki czas miyszejcie, żeby sie grudki niy porobiōły. Miyso pokrejcie we szajby9, wciepcie na chwila nazŏd do zōłzy i mogecie wołać familijŏ do stołu. Smacznego 🙂
1gdzieś
2wołowina marynowana w occie i winie
3przecież
4ziemniaczanej
5przypomni
6patelni
7sos
8roztrzepanej
9plastry
Dodaj komentarz