Ryba lubi pływać- nojlepi we tōmatach (Dorsz w tomacie ;) )

Ryba je dobroł niy yno na piōntek¹, a jak je dobrze narychtowano², to sie może przed niōm sklōdzić³ niyjedne miyso⁴. Na tyn recept⁵ żech prziszoł, jak my mieli mieć bezuch⁶ we piōntek- czowiek myśli, myśli i… tak żech prziszoł na ta ryba we tōmatach⁷. Podoł⁸ żech jōm ze nudlami⁹ i to je chyba nojlepszy dō ni¹⁰ kamrat¹¹. A co nojważniyjsze, gibko¹² sie to warzi¹³.

Co potrza?

50 dkg dorsza

50-70 ml przeciyru ze tōmatōw

1 cebula

1 zōmbek czosku

2 „ône”¹⁴ trołwy citrōłnowyj¹⁵ (chyba szło by pedzieć¹⁶, że źdźbła- ale jak ji niy mołcie, to mogecie zetrzyć skōrka ze jednyj citrōłny)

pynczek pietruszki

połra gałōnzkōw miynty¹⁷

szczypiorek ze jednyj dymki

zaft¹⁸ ze poły citrōłny

sōl i pieprz

trocha chili

łeżka masła klarowanego

łeżka ôleju kokosowego (jak niy mołcie, to mogecie dać łeżka oliwy- abo i 2)

Na maśle i ôleju zeszklijcie cebula i czosnek. Dociepcie¹⁹ do tego pokrōnego²⁰ na mańsze kōnski²¹ dorsza i wlyjcie zaft ze citrōłny. Niech sie to tak ze minuta podpiecze i potyn mogecie wlołć²² przeciyr i wciepnōńć prziprawy. Tera styknie, żeby sie to powarzōło ze połra minut i mołcie jołdło²³ fertich²⁴. Jak byjście chcieli sie to zjejś z nudlami, to nojlepi na samym poczōntku nastawić na nie woda. Smacznego 🙂