Karminadle ze kurōm i kaszōm (Klopsiki drobiowe z kaszą)

Chciołech na mitag¹ narychtować² cojsik inkszego³– bez kartołfli⁴, bo to sie potyn czowiekowi zdo⁵, że sie nawet trocha odchudzo. I jak żech narychtowoł take karminadle i my je ze Babōm⁶ zjedli ze kiszōnōm kapustōm, to… i tak my sie nazarli⁷ 😉 W smaku sōm⁸ richtich⁹ fajne i do tego gibko¹⁰ sie je robi. Take karminadle, abo nawet idzie pedzieć¹¹ karminadelki, to fajnie by tyż wyglōndały na jakim fajerze¹² na przegryzka¹³.

 

Co potrza?

500 g mielōnego miysa ze kurczaka

1 szolka¹⁴ (tako na kafyj) kaszy bulgur- moge być tyż jakołś inkszo, yno, że ze tōm¹⁵ je nojmani¹⁶ roboty

3 łeżki majōnezu

1 jajco

1 łeżka czubrycy (kebyjście ji niy mieli, to mogecie tyż dać np. ziela prowansalske, bydzie smakowało inakszy, ale przeca my sie niy bojymy eksperymyntōw przi warzyniu¹⁷)

1 łeżeczka pasty paprykowyj (moge być tyż łeżeczka papryki suszōnyj, yno, żeby niy bōła za ôstroł¹⁸)

tarto bōłka

sōl i pieprz

ôlyj do pieczynia (a nojlepi, kebyjście mieli kokosowy, bo je nojzdrowszy i niy robi sie z niego… takoł srogo opōna 😉 )

 

Kasza bulgur zalyjcie 2 szolkami wrzōntku we jakim gorku, przikryjcie i za 15 minut baje fertich¹⁹.

Miyso ze prziprawōma i jajcym wciepcie do miski, dociepcie kasza i fajnie wymiyszejcie. Ukulejcie²⁰ małe karminadle, pokulejcie²¹ je trocha we tartyj bōłce i wciepcie na patelnia ze rozgrzōnym ôlejym. Jak już sie fajnie przibrōnołcōm²², to je wyciepcie²³ na jaki talyrz ze ryncznikym papiyrowym, żeby tyn fet²⁴ w niego wciōngło i mogecie sie brać za jedzynie. Kebyjście chcieli, to mogecie je zjejś i ze karołflōma. Smacznego 🙂