Kiszōnoł ćwikla (Kiszone buraki czerwone)

Nojlepsze sōm take lekarstwa, kere¹ idzie ze smakym zjejś². Kiszōnoł ćwikla je tak zdrowoł, jak poła³ aptyki: pomołgo na krew, trołwiynie, odchudzanie, cholesterol, na nyrki i wōntroba… sam szło by jeszcze pisać i pisać. Niyftorzi kiszōm buraki yno na zakwas do barszczu na świynta- bierōm zakwas, wyciepujōm buraki i szlus⁴. Tamte ćwikle ze zakwasu prōbowołech jejś (niy sōm tyż aż tak fajnie chrōpiōnce), ale mi sie pō nich chepie⁵, a te sōm idealne. Woda z tych kiszōnych ćwikli je trocha za słōno, żeby jōm pić, choć joł musza Wōm pedzieć, że tak po pó szklōnki to dołech ji rada 😉 Do zupy bōłaby idealnoł.

Co potrza?

ćwikla/buraki czerwone

do zalywy: łeżka soli na jedyn liter wody (nojlepi kamiynnyj, niyjodowanyj)

trocha korzynia chrzōnu

połra zōmbkōw czosku

trocha kminku

Niy byda Wōm pisał: dejcie na jedna krauza⁶ 3 zōmbki czosku i 10 gr chrzōnu, bo przeca kołżdy z nołs moł inksze⁷ smaki, jedni lubiōm wiyncyj arōmatu ze czosku, a inksi wiyncyj ôstrości ze chrzōnu.

Pokrajejcie ćwikla na kōnski, powciskejcie do krauzy, dejcie tam chrzōn, czosnek i kminek, zalyjcie gorkōm⁸ wodōm ze solōm i ôstołwcie na 4-6 dni. Jak sie na wiyrchu⁹ bydzie zbiyrała piana, to jōm symnijcie¹⁰. Jak buraki już bydōm ukiszōne, to je przełōżcie w tyj krauzie do lodōwki, a tam to już mogōm postołć połra tydni. Take buraki to idzie zjejś do miysa, jako zagrycha albo pogryzać sie na filmie 😉 Pamiyntejcie, że po ukiszyniu tyn czosnek tyż je dobry. Smacznego 🙂