Tōmatynzupa, jakyj żejście jeszcze niy jedli (Wyjątkowa zupa pomidorowa)

Kole¹ mie na handelku kupiōł żech sok ze tōmatōw², kery pōnojś³ bōł wyciskany z tych nojlepszych we siyrpniu. I musza Wōm pedzieć⁴, że takego dobrego żech jeszcze niy piōł. Tak mie jakosik wziyno, żeby tam dociepnōńć yno czerwōne i pōmarańczowe dodatki i wyszła mi z tego pōmidorōwka idealno 😉

Co potrza?

1,5 litra soku ze tomatōw- takich nojlepszych

2 mańsze bataty

2 markwie⁵

szklōnka czerwōnyj soczewicy

1 apfylzina⁶

1 cebula- ôna akurat niy bōła czerwōno, ale kebyjście mieli tako pod rynkōm… 😉

sōl i pieprz

połra gałōnzkōw bazylii

kapka oliwy dlo smaku

Do gorka wlyjcie sok, trocha oliwy, wciepcie tam ździebko⁷ soli, pieprzu i wrojście⁸ pokrōne⁹ na byle jake kōnski markwie, bataty i cebula. Niech sie to powarzi¹⁰, aż zmiynknōm wszyjske składniki (20-30 minut). Niyskorzi dejcie tam bazylia i zmiksujcie to jak kryjmzupa¹¹. Gornek niech przidzie nazod¹² na piec, wciepcie tam soczewica i ôna powinna być fertich¹³ za jake 10 minut. Na kōniec, jak już zupa bydzie wyłōnczōno, to wlyjcie tam sok wyciśniynty ze jednyj apfylziny. A terozki już yno… Smacznego 🙂