Jochanki we biołyj szokoladzie (Torcik porzeczkowy)

Niy dojś, że robi sie to blank1 ajnfachowo2, to jeszcze niy bydzie za kans3 takich, kerym4 to niy posmakuje- chyba, że lubiōm yno torciki ze śledziym 😉

Słodke, choć niy za kans, a do tego jeszcze smak fajnie przełōmany kwaśnawōm czerwōnōm jagōdkōm5.

Co potrza?

6 jajec

ździebko6 soli

6 łeżek mōnki pszynnyj

6 łeżek cukru

łeżeczka proszku do pieczynia

200 g biołyj szokolady

500 g mascarpōne

pólitrowy gorczek jochanek7 abo jak by niyftorzi8 pedzieli9 czerwōnych jagōdek

Nojprzōd biszkopt. Ubijcie biołka ze cukrym i ździebkym soli. Do tego niyskorzi wmiyszejecie pomału10 żōłtka i przesiōno bez sitko mōnka i proszek do pieczynioł. Przełōżcie ta masa do ôkrōngłyj formy i wrojście11 na 40 min do bratruły12 rozgrzōnyj na 160 stopni. Jak tyn biszkopt wyciōngniecie, to przewrōćcie go na jaki desce do gōry dnym i niech tak sie chwila pochōdzi13.

Terozki ôzpuście14 szokolada we kōmpieli wodnyj (miska na gorku ze wrzōncōm wodōm) i wymiyszejcie jōm ze mascarpōne.

Przekrejcie15 biszkopt, posmarujcie jedna czyńść masōm ze szokoladōm i powciepujcie na to poła jochanek. Terozki dejcie na wiyrch16 drugi placek biszkoptu, całojść fajnie posmarujcie kryjmōm, a gōra postrōjcie17 jochankami. Ajnfachowe? Na zicher18. Teroski19 yno na chwila do lodōwki i… smacznego 🙂

1całkiem

2prosto

3dużo

4którym

5czerwona porzeczka

6szczypta

7czerwonych porzeczek

8niektórzy

9powiedzieli

10powoli

11włóżcie

12piekarnika

13postudzi

14rozpuśćcie

15przekrójcie

16górę

17przybierzcie

18na pewno

19teraz

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*