Kyjksy makōwkowe (Ciasteczka makówkowe)




Korciōło mie, żeby upiyc take kyjksy, kere1 by miały wszyjsko to, co majōm makōwki2. I nawet mi sie to udało. Mak jest, mandle3 sōm, rodzynki sōm, je mōnka i jajco, a to prawie jak bōłka i mōmy sam masło, a ône przeca4 je ze mlyka. Idzie pedzieć, że to take makōwki na wynos 😉

Co potrza?

3 żōłtka

1 szklōnka maku (około 100 g)

1 szklōnka pomelanych5 mandli

1 szklōnka mōnki pszynnyj

pó szklōnki cukru

100 g masła

2 gorści rodzynkōw (zamoczōnych pryndzyj6 we rumie abo jakim likerze migdałowym)

łeżeczka proszku do pieczynioł

Pomelany mak żech nojprzōd doł7 na chwila na patelnia, żeby sie tak trocha poprażōł; masło żech łozpuściōł8 we gorczku. Potyn żech miksowoł żōłtka ze cukrym, potyn do tego jeszcze prziszło masło, a jak już cuker bōł dojś łozpuszczōny, to żech tam wciep reszta składnikōw. Jak już to bōło fajnie łozrobiōne9, to żech to łozkuloł10 na ciynki placek i keliszym żech robiōł te kōłka.

Bratruła łozgrzołech na 180 stopni. Kyjkse wrajziōł żech tam na 8-10 minut. Dejcie pozōr11, żeby sie Wōm niy przipołlōły12, bo jo musza Wōm pedzieć, że żech sie przi piyrszyj blasze trocha zalelkoł13 😉 I to by bōło na tyla roboty, terozki już styknie mi pedzieć14: Smacznego 🙂

1które

3migdały

4przecież

5zmielonych

6wcześniej

7dał

8rozpuściłem

9rozrobione

10rozwałkowałem

11uważajcie

12przypaliły

13zagapiłem

14powiedzieć




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*