Szokoladowy biszkopt ze czornymi jagōdkōma (Czekoladowy biszkopt z czarną porzeczką)

[1]Lubia sie pomaszkycić,[2] ale niy lubia, kedy[3] ciasto abo jaki deser je za słodki. Nojlepi, keby[4] sie połōnczōło w nim słodke i kwaśne, bo bez tyn kōntrast czowiek lepi czuje wszyske smaki. I jak łostatnio na zygrōdce[5] u Teściowyj jołd[6] żech sie te czorne jagōdki, to mie tak prziszła chyńć[7] na take ciasto:

Co potrza?

Biszkopt:

5 jajec

4 łeżki[8] mōnki pszynny

1 łeżki mōnki kartołflany[9]

2 łeżki kakao

5 łeżek cukru

2 łyżeczka proszku do pieczynia
Środek:
1 kg czornych jagōdek
50 g szokolady (moge być gorzkoł)
5-8 łeżek cukru
3 łyżeczki żylantyny

Kryjm:
250 g mascarpone
1 szokolada
150 g śmiytōnki[10]

Nojprzōd[11] sie umyjcie i zmiksujcie te jagōdki. Wciepcie[12] do garca i na małym łogniu[13] niech sie trocha powarzōm.[14] Tera wciepcie tam cuker, szokolada i dalyj miyszejcie. Jak sie to wszysko dobrze łospuści,[15] to wyłōnczcie,[16] wciepcie żylantyna, łozmiyszejcie[17] i niech sie chōdzi.[18]

Terozki biszkopt. Rozgrzyjcie sie piec na 165 stopni i przigotujcie sie tortownica- jak mołcie[19] tako zamykanoł, to na ta dolnoł czyńść mogecie sie dać tyż piapiōr[20] do pieczynioł.

Biołka łoddzielcie od żōłtek i  przesiyjcie sie ta mōnka i kakao. Do tych biōłek wciepcie[21] trocha soli i ubijcie. Pod kōniec wsypcie tam cuker i dalyj ubijejcie. Po jednym[22] wciepujcie żōłtka, potyn[23] zmniyjszcie[24] łobroty[25] i wsujcie[26] tam ta mōnka, kakao i proszek. Ubijejcie jeszcze trocha i wlyjcie[27] to do ty[28] tortownicy. I rajn[29] do pieca na 35-40 minut. Jak bydziecie jōm wyciōngać, to odwrōćcie ta forma do gōry dnym i ściepnijcie[30] na stōł (ze 20 abo i 30 cm). I niech sie łona[31] tera trocha łodpocznie.[32]
Kryjm je tak ajnfachowy,[33] że nawet sie niy łobejrzyjcie, a baje fertich.[34] Ubijcie śmiytōnka- na kōniec wciepcie do ni 2 łeżki cukru pudru. Szokolada łozpuśćcie w jaki misce nad wrzōntkym i wymiyszejcie ze mascarpone. Tera do tego dodołwejcie pomału szlagzany[35] i fajnie wymiyszejcie. Fertich.

Jak biszkopt łochōdnie, to go przekrejcie.
Do środka dejcie[36] masa ze jagōdkōma, przikryjcie drugōm połōwkōm i zarozki[37] posmarujcie  boki kryjmōm, to niy wypłynie Wōm ta masa ze środka- keby niy chciała stwardnōńć.[38] Łozsmarujcie[39] sie fajnie ta kryjma, mogecie jeszcze na gōrze sie zrobić jake wzorki, abo posypać szokoladōm. Dejcie te ciasto jeszcze do lodōwki, a potyn to już yno smacznego 🙂

Szokoladowy biszkopt ze czornymi jagodkoma-małe

 

 

 

[1] ō- samogłoska w wymowie między u a o

[2] zjeść słodyczy

[3] kiedy

[4] jakby

[5] ogródek

[6] jadłem

[7] chęć

[8] łyżek

[9] mąki ziemniaczanej

[10] śmietany

[11] najpierw

[12] wrzućcie

[13] ogniu

[14] pogotują

[15] rozpuści

[16] wyłączcie

[17] rozmieszajcie

[18] studzi

[19] posiadacie

[20] papier

[21] wrzućcie

[22] pojedynczo

[23] później

[24] zmniejszcie

[25] obroty

[26] wsypcie

[27] wlejcie

[28] tej

[29] do środka

[30] zrzućcie

[31] ona

[32] odpocznie

[33] prosty

[34] będzie gotowy

[35] ubitej śmietany

[36] włóżcie

[37] zaraz

[38] stężeć

[39] rozsmarujcie

2 thoughts on “Szokoladowy biszkopt ze czornymi jagōdkōma (Czekoladowy biszkopt z czarną porzeczką)

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *