Panczkraut abo ciapkapusta (Śląskie danie regionalne na bazie ziemniaków i kapusty)

Panczkraut je do ślōnski1 kuchni jak Mōna Liza do Luwru- jak żejście go niy jedli, to psińco2 ô3 ni4 wiycie. Piyrwy5 niy bōło ślōnski rodziny, co by go aby rołz6 za tydziyń niy miała na stole. U moji7 Mutry8 w dōma bōł9 pōnojś10 w kołżdo11 sobota. Nojlepszym kamratym12 panczkrautu sōm karminadle, choć joł żech sie go zjołd13 ze pieczōnym wōsztym14 i tyż bōło dobre. I jak kołżdo reprodukcja Mōna Lizy wyglōndo trocha inaczyj, tak niy ma jednego receptu15 na panczkraut. Kołżdo gospodyni abo kuchołrz mo swōj i bez to mogecie16 sie szczelić połra17 roztomajtych18 wersji tyj ciapkapusty.

Co potrza?

kartołfle19– moge ich być tyla samo co kapusty, ale pamiyntejcie, że przi takim panczkraucie to sie wszysko warzi na ôko 😉

kapusta- joł żech go robiōł ze kiszōnōm, ale idzie zrobić tyż ze świyżōm (stare kuchary dołwajōm dō ni trocha octu, żeby bōła fajnie kwaskowato)

I tera, jak idzie ô dodatki, to tyż mołcie połra wersji:

  1. wyndzōnka20
  2. wyndzōnka ze cebulōm
  3. ajnbryna21– fet22, mōnka23 i trocha wody

Kartołfle i kapusta uwarzcie we ôsobnych gorkach. Jak już kartołfle bydōm miynke, to ôdcedźcie je i posztamfujcie24. Wciepcie do tego ôdcedzōno kapusta i przismażōno wyndzonka abo wyndzonka przismażōno ze cebulom i wymiyszejcie. Dosmakujcie25 solōm i pieprzym… i fertich26.

Kebyjście chcieli sie zrobić ta ajnbryna, to na patelnia wciepcie trocha fetu, mōnki i leko jōm zbrōnołćcie27, gichnijcie28 do tego trocha wody i wciepcie do kartołfli i kapusty. Jak byście niy mieli fetu, to mogecie jōm tyż zrobić na maśle klarowanym- taki panczkraut bydzie idealny we piōntek do pieczōnyj ryby. Smacznego 🙂

 

1ō- samogłoska w wymowie między o i u

2nic

3ô= ło

4niej

5dawniej

6raz

7mojej

8mamy

9był

10podobno

11każdą

12kolegą

13zjadł

14kiełbasą

15przepisu

16możecie

17kilka

18różnych

19ziemniaki

20boczek wędzony

21zasmażka

22smalec

23mąka

24utłuczcie

25doprawcie

26gotowe

27przysmażcie

28nalejcie

6 thoughts on “Panczkraut abo ciapkapusta (Śląskie danie regionalne na bazie ziemniaków i kapusty)

Odpowiedz na „Weronika SAnuluj pisanie odpowiedzi

Twój adres email nie zostanie opublikowany. Pola, których wypełnienie jest wymagane, są oznaczone symbolem *