Kurka… ze cukiniōm (Danie ekspresowe ;) )

Sōm take dni, kej1 niy chce nōm sie stoć przi piecu, a chciałoby sie zjejś cojsik dobrego i bestōż2 Chop sam wciepuje te recepty, co by Wołs trocha odciōnżyć łod tego myślynia: co by tu uwarzić?

Te danie sie robi połra minut, ale tyn delikatny smak to bydzie dobry nawet dlo rozbestwiōnych3 degustatorōw.

Co potrza?

2 małe cukinie

20 dkg kurek

10- 15 dkg wyndzōnki4

trocha wōsztu- joł żech doł 2 frankfurterki

sōl, pieprz

trocha majeranku

łeżka masła klarowanego

Wyndzōnka i wōszt pokrejcie i na jaki patelni je przismołżcie5– mogecie do tego tyż wciepnōńć trocha masła klarowanego. Kurki wyczyśćcie- jōł tam je trocha umōł, choć sōm i take ludzie, co to grziby yno czyszczōm pyndzlym6 😉 Grziby i cukinia pokrejcie, wciepcie ze prziprawōma na patelnia i tak dugo je podpiykejcie, aże cukinia bydzie miynkoł (we łopolskim7: bandzie8 😉 ). No i fertich.9 Dlo 2 ludzi tako porcja styknie, a przi okazji mołcie tyż na tyla dietetycznie, że sie potyn mogecie zjejś kōnsek kołołcza10 😉 Smacznego 🙂

Kurka... ze cukiniom-małe

1kiedy

2dlatego

3rozpuszczonych

4boczku wędzonego

5przysmażcie

6pędzlem

7opolskim

8będzie

9gotowe

10kołacza

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *