Gibkoł zōłza ze rybōm- niy yno na piōntek ;) (Ekspresowy sos z rybą- nie tylko piątkowy)

Niy rołz, niy dwa mołcie1 jaki bezuch2 we piōntek3 i zarozki sie robi problym, co by tu narychtować4, bo przeca jakby jakymu Ślōnzokowi dać we piōntek miyso na stōł, to by jeszcze mōg5 dostać hercszlag6 i to byjście sie dopiyro narobiyli problymōw. Ta moja zōłza7 je takoł barzi tajskoł, ale jak już fto sam czytoł połra receptōw, to wiy, że Chop to lubi mieć na talyrzu cołki świat 😉

Co potrza?

40-50 dkg ryby (joł mioł filet ze mintaja, ale mogecie dać i jakoł inkszoł ryba)

czerwnoł papryka

krauzka8 pyndōw9 ze bambusa

szklōnka zielōnego groszku (nojlepi mrożōnogo, ale jak niy mołcie, to moge być i ze biksy10)

biksa mlyka kokosoweko

pynczek cebuli dymki

połra gałōnzkōw kolyndry

pó zaftu ze citrōłny

2 łeżki zielōnyj pasty curry (kebyjście ji11 niy mieli, to dejcie łeżeczka prziprawy curry, trocha chili, zetarto skōrka ze citrōłny, zaft niy ze poły, ale ze całyj citrōłny, zōmbek czosku, trocha imbiru, trocha potrzaskanych ziorkōw kolyndry i kminu rzymskego; takoł pasta moł dużo śwyżyj trołwy citrōłnowyj, a taki niy idzie kupić byle kaj, a do tego jeszcze moł i inksze rzeczy, co to mojōm charaktetystyczny smak, ale i bez ni idzie sie dać rada 😉 )

ździebko12 chili

2 łeżki masła klarowanego

2-3 łeżki oliwy

sōl i pieprz

Na sōm poczōntek na maśle klarowanym zeszklijcie pokrōno13 cebula (ta ze dymki)- dejcie14 do tego trocha soli, bo pōnojś15 bez to zrobi sie jeszcze lepszoł. Potyn na chwila dociepcie do tego pokrōnoł papryka, niyskorzi16 groszek, pyndy bambusa i dolyjcie tyż trocha oliwy. Zalyjcie to mlykym kokosowym i dejcie pasta curry, chili, sōl i pieprz ( jak niy mołcie pasty, to wciepcie te iksze składniki, co to żech je wypisoł trocha wyżyj). Jak już groszek sie baje17 robiōł miynki, to wciepcie tam na chwila pokrōnoł na mańsze kōnski18 ryba. I za połra minut zōłza mołcie fertich19. Jak już baje na talyrzu, to posujcie20 jōm po wiyrchu21 pokrōnōm dymkōm i kolyndrōm.

Takoł zōłza mogecie zjejś22 ze ryżym, nudlami23 abo i jakōm dobrōm bōłkōm24. Smacznego 🙂

Gibkoł zołza rybnoł-małe

1macie

2odwiedziny

3piątek; ō- samogłoska w wymowie między o i u

4przygotować

5mógł

6zawał serca

7sos

8słoik

9pędów

10puszki

11jej

12szczypta

13pokrojoną

14dajcie

15podobno

16później

17będzie

18kawałki

19gotowa

20posypcie

21na górze

22zjeść

23makaronem

24bułką

2 thoughts on “Gibkoł zōłza ze rybōm- niy yno na piōntek ;) (Ekspresowy sos z rybą- nie tylko piątkowy)

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *