Trzołski ze miysa (Mięsne patyczki)

Niyrołz1 sie mogōm2 czowiekowi zmiyrznōńć3 karminadle4 i rolady i chciałoby sie ôbejrzeć5 na talyrzu cojsik inkszego6. Tak żech se myśloł, inspirowoł roztomajtymi7 kuchniami świata i tak żech prziszoł na moje trzołski8. Fajnie wyglōndajōm , richtich9 dobrze smakōjōm… nic, yno sie brać za robota.

Co potrza?

500 g mielōnego miysa wieprzowego

200 g wyndzōnki10

1 zōmbek11 czosku

2 łeżeczki tymianku

1 łeżeczka majeranku

sōl i pieprz

Ta wyndzōnka mogecie zmielić cuzamyn12 ze miysym, ale mogecie tyż jōm pokrajać we kostka i przipiyc na patelni i potyn dociepnōńć do mielōnego miysa. Bez to bydziecie mieli całkym inkszy smak.

We misce wymiyszejcie sie miyso, wyndzōnka, przeciśniynty czosnek i prziprawy. Niyskorzi uformujcie z tego misa take sztangi (wałki) i mogecie sie brać za pieczynie. Joł żech je robiōł na patelni grillowyj, ale i na taki ajnfachowyj13 tyż- mie sie zdo- bydōm14 dobre. Jak już ze kołżdyj strōny fajnie sie przipiekōm, to mogecie sie pomału15 rychtować16 do jedzynia. Smacznego 🙂

1czasem

2mogą ; ō- samogłoska w wymowie między o i u

3znudzić

4mielone

5ô= ło

6innego

7różnymi

8trzaski, małe drewienka

9naprawdę

10wędzonego boczku

11ząbek

12razem

13zwykłej

14będą

15powoli

16przygotowywać

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *