Szplitry

Piecze moja Muter, to i terozki przyszła kolyj na mie.

Je to take proste, że nawet ludzie, co to bez Pōn Bōczka zostali łobdarzyni dwiyma lewymi rynkami, dajōm sie rada.

Co nōm sie do tegoł przidoł?

 

25 dkg biołego przepresowanego syra

25 dkg masła

25 dkg mōnki

Litrowo krauza[1] marmolady z jabek abo jaki inkszy marmolady. A jak zrobić se samymu tako marmolada, to Wōm za chwila powia.

 

Take cztyry składniki to nawet ludzie ze sklerozōm zapamiyntajōm 😉

Jakbyjście chcieli dołwać do tego taki kupiōny syr do syrnikōw, to musicie uważać, bo łon je niyrozki trocha za rzołdki i cza do tego po tym wciepnōńć wiyncy mōnki.

No i co dali?

Wciepcie tyn syr, masło i mōnka do miski i porzōndnie je ugniyćcie. Jakby sie Wōm za mocno klejōło do rynki, to dosypcie jeszcze trocha mōnki. Jak już to wszystko baje wyrobione na jednolito masa, to dejcie to na godzina do lodōwki, a nojlepi na całoł noc.

Rozgrzyjcie piec na 180 stopni i przigotujcie sie blacha- żeby sie te szplitry lepi ściōngało, to połōżcie na tyj blasze tyż taki papiōr do pieczynioł.

Terozki potrzebno Wōm byndzie nudelkula[2] i jeszcze trocha mōnki do podsypywania. Wyciōgcie sie mały kōnsek tego ciasta, posypcie na stole abo blacie trocha mōnki- żeby sie niy klejōło- i wałkujcie- nudelkula tyż mogecie trocha posypać tōm mąkōm.

Jak już te ciasto bydzie miało yno pora milimetrōw, to wejście nōż i potnijcie to na 8 abo 10 cm kwadraty. Do środka kołżdego kwadrata wciepcie trocha marmolady i dwa boki klapnijcie do środka- jak na zdjyńciu.

Jak już mołcie połno blacha, to dejcie jōm do pieca na 20 minut. Jakbyjście widzieli, że już pryndzy robi się za bardzo brōnołtne, to wyciōngejcie je pryndzy. Ale jakbyjście widzieli, że niy majōm jeszcze fajnego złotego koloru, to je jeszcze tam poczimcie. Kołży piec je trocha inkszy i to trza sie samymu sprołwdzić.

Terozki zostało nōm już przeciepnōńć te szplitry do miski, posypać trocha cukrym pudym i…smacznego:)

 

Jak żech to robiōł i zabrakło mi trocha marmolady, to dołech do środka szplitra kōnsek gruszki i tyż bōło bardzo dobre. A jak lubicie eksperymynty, to mogecie wciepnōnć tam i jaki inkszy słodki owoc, np. kōnsek banana. Pamiyntejcie yno, żeby te owoce niy bōły za wodnite. To samo sie tyczy tyż dżymu, jakbyjście go tam wraziyli, to moge Wōm wypłynōńć i zamiast fajnych szplitōw bydziecie mieli na blasze ciarajstwo[3].

 

 

Marmolada z jabek

 

Moja Muter jōm tak robi i za kołżym razym je dobroł.

Co potrzeba?

1 kg pokrōnych na małe plastry jabek

0,5 kg cukry

40 ml łoctu

 

Wciepcie to wszysko do garca i łodstołwcie na noc- nojlepi do lauby[4], a jak niy mołcie lauby, to w jake inne chōdne miejsce. Na drugi dziyń postołwcie to na piecu i niech sie trocha podsmażi. Jak mołcie miynke jabka, to styknie, żeby to yno trocha pobulgotało i baje fertich[5], a jak mołcie trocha twardsze, to mogecie je posiekać mikserym. Pamiyntejcie, żeby boło fajnie gynste. Jak mołcie tego wiyncy, to idzie i wciepnōńć do krauzy- przidoł sie do kołołcza abo i na sznita[6]🙂

 

 

[1] słoik

[2] wałek do ciasta

[3] bałagan

[4] ganek

[5] gotowe

[6] kromka chleba

Szplitry- małe 2

 

Smacznego 🙂

 

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




5 Komentarze

  1. Czejś.
    Jo jednak bardzij godom.
    No entlich się ftoś łodważoł i po nazszymu napisoł jake se jedzynie rychtuje. No chopie, zaroski mom pełno gymba tego smaku. I jeszcze o marmeladze napisoł…
    Jo niy waża ani niy pieka – niy żebych niy umioł abo mi się niy chciało – moja (baba) ważi lepij, a co do pieczynia… bracik to robi lepij ale łon jest „daleko”, a o Mutrze niy wspomna. Mój Ôpa bôł piekporzym ale yno do wojny, potym niy mioł rynki i niy mog piyc.
    Kedyś, we jedna Wilijo narychtowoł żech ryba, teśiowo miała być u nos na Wieczeży. Mioł być karp ale niy zdonżoł żech go kupić i bôł pstrąg we winie – do dzisiej niy wiy co to za ryba boła.
    Na razie tela, bydymy się zaś witać po Pasterce.
    JR

    • Dziynkuja 🙂 cojś żech sie przejrzoł- już poprawiōłech na 25 dkg 🙂 Ale jakby fto robiōł srogi fajer, to może i dać te 250 dkg, yno że do tego to trza by połra krauzōw ty marmolady 😉

Dodaj komentarz

Twój adres email nie zostanie opublikowany.


*