Niyrŏz na fajer1 ida ze tortōm, a dlo tyj kōmratki2 zawsze robia jake eksperymynty. Terŏzki mie naszło na szokolada ze kafyjym, a żeby jeszcze bōło jake małe owocowe przełōmanie smaku, to żech jedna szichta3 posmarował powidłami śliwkowymi.
Co potrza?
Biszkopt:
6 jajec- jŏ żech mioł blank4 małe, to żech tam wciep ich 7
125 g cukru
100 g mōnki
40 g kakao
plaskatŏ5 łeżeczka bakpulwru6 (kakao je ciynżke i to już lepi sie trocha wspōmōc, ale mogecie tyż narychtować tyn biszkopt bez bakpulwru)
200 g powideł śliwkowych
2 podwōjne espresso
200 g szokolady deserowyj (obo gorzkyj)
2 mascarpōne (take po 200 g)
2 łeżki śliwowicy (choć mogecie nasōnczyć tyn biszkopt samym kafyjym abo dać tam kōniak, abo rum)
Biszkopt nojlepi narychtować7 dziyń pryndzyj. Jajca ubijcie ze cukrym (nojprzōd na średnich ôbrotach, a potyn pŏra minut na nojwyższych- jak mŏcie robota kuchynnego, to nawet i 10 minut sie mogecie ôdpocznōńć, a ôn niech sie trŏpi8 😉 Potyn wmiyszejcie ku tymu pōmału przesiōnoł mōnka, kakao i bakpulwer. Przelyjcie to niyskorzyj do tortownicy i dejcie na 30-35 minut do łozgrzōnyj na 175 stopni bratruły9.
Jak już biszkopt bydzie fajnie ochōdzōny, to go przekrejcie na 3 placki. Wymiyszejcie jedne espresso ze śliwowicōm i nasōnczcie tym biszkopt (biercie po trocha na łyżka i gichnijcie to tu , to tam).
Dolny placek posmarujcie powidłami i wciepcie na niego tyn nostympny. Terŏzki we kōmpieli wodnyj (miska nad gorkym ze wrzōntkym) łozpuśćcie szokolada (dejcie tam tyż łeżka mascarpōne), niyskorzij wymiyszejcie ze resztōm piyrszego mascarpōne i posmarujcie tōm masōm drugi placek. I już my sōm prawie w dōma 😉
Druge espresso i szokolada łozpuśćcie zajś we kōmpieli wodnyj, wmiyszejcie tam mascarpōne i mogecie sie brać za smarowanie wiyrchu. Te esy-floresy to żech zrobiōł rynkŏwym cukierniczym i widołkōm.
Smacznego 🙂
1imprezę
2koleżanki
3warstwa
4całkiem
5płaską
6proszku do pieczenia
7przygotować
8męczy
9piekarnika
Dodaj komentarz