Ożarto wołowina (Boeuf à la bourguignon ;) )

Uwarzynie tego dania je łatwiyjsze, niż napisanie łod niego nazwy po francusku, a jak już je rołz¹ narychtujecie,² to potyn bajecie³ co jakiś czas do niego wrołcać. Joł noprzōd sie tym zainteresowōł, jak żech oglōndoł film „July i Julia”- fto go niy widzioł, tyn musi to nadrobić. Potyn, jak my z mojōm Babōm⁴ zaprołszali na bezuch nasza kōmratka,⁵ to żech łonyj napisoł, co by sie tak wymarzōła zjejś- niyrozki take pytania gościom zadołwōm⁶– a łona napisała, że boeuf bourguignon… i sie zaczło 😉 Nim cojsik takego nowego przirzōndza, to sprawdzōm połra receptōw,⁷ a potyn- jak jaki didżej- miksuja z tego swoja wersja, a przi okazji robia jeszcze połra eksperymyntōw. Wyszło dobre i wtedy, i na drugi rołz, i na trzeci… 😉

Co potrza?

0,5 kg wołowego miysa (keby⁸ Wōm w rynce⁹ wlecioł jaki wiynkszy kōnsek¹⁰, to sie go wejście¹¹)

10 dkg wyndzōnki¹²

1 zōmbek czosku

1 cebula

1 marchewka

4 łeżki małych marynowanych cebulek

20-25 dkg pieczarkōw

1 łeżka kōncyntratu ze tōmatōw¹³

1,5 szklōnki czerwōnego wytrawnego wina

połra gałōnzkōw tymianku

połra gałōnzkōw pietruszki

ze 5 liści bobkowych¹⁴

0,5 litra buliōnu wołowego

masło klarowane

sōl, pieprz

trocha mōnki pszynnyj do zagynszczynia zōłzy

Nojlepi dziyń pryndzy¹⁵ pokroć te miyso na mańsze¹⁶ kōnski i polołć¹⁷ leko¹⁸ winym. Na drugi dziyń- a jak niy mołcie¹⁹ tela czasu, to mogecie zalołć ta wołowina yno²⁰ na chwila- na rozgrzōnyj patelni, na 2 łeżkach masła klarowanego podpiyczcie pokrōno wyndzōnka. Jak sie podpiecze, to przełōżcie jōm do brytfanki (masło niech łostanie na patelni), a na patelnia wciepcie²¹ osuszōne miyso. Dejcie pozōr,²² żeby go niy bōło za kans,²³ bo sie niy bydzie podpiykać, yno puści wodo i sie baje dusić. Jak sie całe miyso przibrōnołci,²⁴ wlyjcie na patelnia wino i wszysko przelyjcie do brytfanki. Te wino, co to sie w nim marynowała wołowina, tyż sam wykorzystejcie. Do brytfanki wciepcie tymianek, pietruszka i liście laurowe (we Francji gołdajōm na to bouquet garni [buke garni]), mogecie je nawet razym zwiōnzać abo zrobić taki mały bojtlik²⁵ ze gazy, bo na kōniec te zioła sie wyciepuje i lepi sie je wtedy znojś.²⁶ Dodejcie sam jeszcze łeżka kōncyntratu, 0,5 litra buliōnu, wyciśniynty czosnek, pieprz i trocha soli- żeby jyj niy bōło za kans, to sie tyj zōłzy noprzōd skosztujcie. Piekarnik sie rozgrzyjcie pryndzy na 150 stopni i wrołźcie tam ta brytfanka na 2-3 godziny.

0,5 godziny przed kōńcym dociepcie do wołowiny: zeszklōno na maśle cebula i leko przismażōne pieczarki i marchewka.

Jak już te 2 abo 3 godziny minōm, wyciōngcie brytfanka ze piekarnika i tera mogecie leko zagyńścić ta zołza. Wyciōngcie sie na jaki talyrz wiynksze kōnski miysa, rozfyrlejcie²⁷ ze 2 łeżki mōnki we pó²⁸ szklōnki zimnyj wody, postołwcie brytfanka na małym łogniu na piecu i wlyjcie do ni²⁹ rozfyrlano mōnka. Rozmiyszejcie sie to fajnie, niech ta zōłza połra razy bluknie³⁰, wciepcie tam rajn³¹ zajś te miyso, żeby sie trocha ogrzoło i fertich.

Do taki ożartyj wołowiny nojlepi sie wziōńć bagetka, bo niōm idzie tōnkać zōłza i fajnie wypucować³² talyrz. Jak już bydziecie jōm naklołdać, to po wiyrchu mogecie jōm posuć pokrōnōm pietruszkōm. Smacznego 🙂