Schab dlo ciyrpliwych (Schab gotowany w niskiej temperaturze)

Jak yno pisza tyn recept¹, to już wiym, że niyftore² moje ulubiōne kōmyntatorki zaroski³ pedzōm⁴: „To niy je dō mie, joł je za zgniōło⁵.” Ja, joł wiym, że jak czowiek widzi, że trza cojś rychtować bez 3 godziny, to zaroz dostołwo gyńsij skōrki, ale przeca to wcale niy znaczy, że bez 3 godziny trza stołć przi piecu. Jak joł żech to warzōł, to żech tyn schab zostawiōł we bratrurze⁶ i żech sie poszoł do sklepu, bo jak sie coś waży we tymperaturze 65 stopni, to to sie przeca niy przipołli⁷. A jak potyn dołcie na stół kōnsek takigo miysa, to nawet nojbarzi zmiyrzło teściowoł bydzia musiała Wołs pochwołlić 😉

Co potrza?

1 kg schabu

skōrka ze jednyj citrōłny⁸

połra gałōnzek oregano

sōl i pieprz

Te warzynie to je trocha inspirowane francuskim sous-vide (czytej: su vid ), a oznaczo to warzynie miysa we woreczkach bez luftu⁹. Żeby tak to wszysko narychtować, to trza by mieć sprzynt za połra tysiyncy złotych, a my przeca sōm szporowliwi¹⁰ i sie znojdymy trocha tōńszo wersja. Joł żech sie tyn umyty i obkrajany ze tustego kōnsek schabu ze prziprawami (i citrōłnōm) wrajziōł¹¹ do rynkołwa do pieczynia i szczelnie żech go zamknōł. Bratruła żech rozgrzoł na 65 stopni, a na piecu we gorku żech podgrzoł woda tyż do tyj samyj tympyratury (mōm taki fajny termōmetr, co to niy yno mierzi tympyratura łod ludzi, ale i idzie go przestawić na mierzynie tympyratury we izbie- niy, niy bōł wcale drogi 😉 ). Potyn żech wciep te miyso (w tym bojtlu¹²) do gorka, gornek doł do bratruły, nastawiōł zygor¹³ na 3 godziny i prawie po robocie. Jak już tyn czas przyjdzie, to trza ochōdzić¹⁴ te miyso we tymperaturze pokojowyj, a niyskorzi nojlepi je jeszcze wrajzić do lodōwki, żeby te wszyske soki ze tego miysa wlazły do niego nazod¹⁵ rajn¹⁶. Nim żech je doł na stōł, to żech je na chwila wciep na patelnia grillowo i fertich. A terozki już yno czeko na Wołs niebo we gymbie 😉