Armeriter de lux (Bułkowy recykling de lux ;) )

Mōndre¹ ludzie by pedzieli,² że ta nazwa to je richtig³ oksymoron, bo armeriter pochodzi łod niymieckego Arme Ritter, co znaczy biydny rycerz, a co to je de lux, to już chyba wiedzōm nawet małe bajtle⁴– jak we jednyj nazwie sie znojdōm 2 przeciwstawne wyrazy, to je oksymorōn; rechtory⁵ bydōm⁶ zachwycōne 😉 De lux tak po prołwdzie⁷ to je ta zōłza, a jak jeszcze bydziecie mieli dō ni świyże pozimki,⁸ to take śniołdanie straci sie, nim zdōnżycie dopić Wasza kawa.

Co potrza?

3 stare bōłki abo jak to niyftorzi gołdajōm: żymły (jak byjście mieli lynga⁹ abo wek- bo to tyż moł roztomajte miana, to tyż baje dobre)

2 jajca

szklōnka mlyka

2 łeżki brōnołtnego¹⁰ cukru

2 łeżki masła klarowanego

kapka łoleju

zōłza:

10-15 dkg pozimek

1 biołoł¹¹ szokolada

1 łeżka miodu abo brōnołtnego cukru, keby Wōm ta zołza bōła za moło słodkoł

Obrane pozimki zmiksujcie, postołwcie na piecu na małym łogniu (niy mogōm sie zawarzić¹²) i wciepcie¹³ tam do rozpuszczynia ta biołoł szokolada. Jak sie rozpujści, to mogecie jeszcze dać trocha miodu (abo cukru) i fertich. ¹⁴

Jajca rozfyrlejcie¹⁵ (mogecie i mikserym) ze cukrym i mlykiym. Rozgrzyjcie sie na patelni łeżka masła i kapka łoleju. Pokrejcie bōłka abo wek na szajby,¹⁶ porzōndnie tōnknijcie¹⁷ we jajcach z mlykym i wciepcie na patelnia. Jak sie fajnie przibrōnołci¹⁸ ze obu strōn, to wciepcie je na talyrz, łoblyjcie zołzom i smacznego 🙂