Torta ze szinkōm (Tort z szynką)

Na samym poczōntku¹ powiym, że ta torta je² bez cukru i tak barzi³ mogecie⁴ jōm dać na przistawka, niż do kawy. A wszyjsko⁵ sie wziyno⁶ z tego, że moja Kobiyta⁷ padała⁸, że ôna⁹ bez post niy bydzie¹⁰ jadła słodkego. A jak sie bez¹¹ tyn czas trefi Chopowi¹² gyburtstag¹³, to już po ptokach. A że tyn ôd ni Chop – jak już żejście mogli sie niyrołz prziś do tego¹⁴– jōm bestwi¹⁵, to wymyśłōł torta, kero¹⁶ i ôna mōgła zjejś. Co słodkego tyż bōło… ze kokosym- bo ôna go niy lubi 😉

Co potrza?

Biszkopt:

6 łeżek mōnki pszynnyj razowyj (jak byjście ji¹⁷ niy mieli, to mogecie dać takoł barzi zmielōnoł)

6 jajec

2 łeżeczki proszku do pieczynioł

Kryjma¹⁸ driny¹⁹:

15 dkg szinki

3 uwarzōne na twardo jajca

pynczek radiskōw²⁰

3 łeżki majōnezu

trocha sznitlochu²¹

pieprz

Kryjma na wiyrchu²²:

1 syrek maskarpōne

połra gałōnzkōw bazylii

150 ml śmiytōnki²³ krymōwki

sōl i pieprz

Do strojynia²⁴:

100 ml śmiytōnki

małe tōmaty²⁵

zielōny ôgōrek

Nojprzōd sie bierymy²⁶ za biszkopt- nojlepi dziyń pryndzyj²⁷. Joł żech go robiōł ze mōnkōm razowōm, bo je zdrowszoł i dała tyż tyj naszyj torcie inkszy smak. Yno²⁸ musicie pamiyntać, że ta mōnka je ciynżkoł²⁹ i tyn biszkopt Wōm tak niy wyrojśnie.

Żōłtka ôddzielcie ôd biołek. Biołka ubijcie (dejcie dō nich ździebko³⁰ soli), potyn na małych ôbrotach miksera dejcie³¹ żōłtka. Mōnka i proszek wmiyszejcie do tyj masy poleku³² jakōm warzechōm. Bratruła³³ nagrzyjcie do 165 stopni, biszkopt dejcie do formy i wrojście go rajn³⁴ na 35-40 minut. Jak już baje³⁵ upieczōny, to go wyciōngcie³⁶, ôbrōćcie forma na ôpy³⁷ i ściepnijcie³⁸ ze 20-30 cm na rozłożōny na stole ryncznik (niy bydzie tak opadać). Jak ochōdnie- a nojlepi na drugi dziyń- mogecie tyn biszkopt przekrajać.

Tera bierymy sie za kryjma driny. Joł żech wszyjske te składniki wciep do robota kuchynnego, kery to posiekoł, ale jak takigo niy mołcie, to pokrajcie³⁹ te składniki na drobno, dejcie majōnez, wymiyszejcie i posmarujcie dolny placek. Na wiyrch wciepcie tyn drugi i idymy⁴⁰ do nastympnyj kryjmy.

Listki ze bazyli zblyndujcie ze śmiytōnkōm, a niyskorzi⁴¹ jōm ubijcie, wciepcie trocha soli, pieprzu, maskarpōne, wszyjsko fajnie wymiyszejcie, a potyn rozsmarujcie po całym biszkopcie z wiyrchu.

Śmiytōnka do strojynia ubijcie, dejcie do szpricy i mogecie wymyślać roztomajte⁴² wzory na wiyrchu torty. Joł żech tam doł tyż małe tōmaty i pokrajane strugaczkōm duge szajby⁴³ zielōnego ôgōrka. Roboty trocha bōło, ale jak sie chce zaskoczyć gojści⁴⁴ tortōm ze szinkōm, to sie trza⁴⁵ natrołpić⁴⁶, ale za to potyn… czeko nołs⁴⁷ kans⁴⁸ dobroci 🙂