Kołŏcz ze syrym

Kołŏcz to je chyba nojbarzi ślōnske ciasto. Piyrwy¹ taki kołŏcz pieczōny bōł na kōmunia, przi weselu i może jeszcze przi wiynkszych świyntach. Kołŏcze ze syrym i makym sōm prawie jak cwilingi², ale jŏ żech je rozdzielōł i sam bydymy yno rychtować³ jednego ze cwilingōw 😉

Recept tak po prŏwdzie je ôd moji Ōłmy⁴ Albiny i bez to idzie pedzieć⁵, że to już je pōnad stuletniŏ tradycyjŏ 🙂

Co potrza?

Te skłodniki co sam mŏcie⁶ , to styknōm⁷ na jedna blacha.

250 g mōnki

1 jajco

1/3 kostki masła

poła szklōnki cukru

1/4 kostki drożdży (25 g)

3/4 szklōnki mlyka

cuker waniliowy abo kapka arōmatu (yno żeby bōł waniliowy, a niy waniliNOwy)

ździebko soli

Syr:

1 kg syra (nojlepi taki normalny, kery trzeba przepresować)

5 jajec

3/4 szklōnki cukru

poła kostki masła

2 pudingi⁸

2 gorście rodzynek (nojlepi je bez noc moczyć we rumie)

połra kapkōw arōmatu ze wanilii

Posypka:

10 dkg masła

10 dkg cukru

1 szklōnka mōnki

ździebko proszku do pieczyniŏ

a jak bajecie chcieli mieć dwie farby tyj posypki, to jeszcze łeżka kakao

Na sōm poczōntek idzie drożdżowy spodek. Przesiyjcie sie mōnka do jaki srogyj⁹ miski. Pośrodku zrōbcie dziura, wsujcie tam cuker, pokruszcie drożdże i zalyjcie to letnim mlykym. Terŏzki trza poczekać, aże drożdże napocznōm robić- dejcie im tak aby 10-15 minut. Potyn wlyjcie tam łozpuszczōne¹⁰ masło, jajco, ździebko soli, wanilia i mogecie sie zabiyrać za wyrŏbianie. Nojlepi bydōm mieli ci, kerzi¹¹ majōm robota kuchynnego, niech ôn sie bez 15 minut wejźnie za wyrŏbianie ciasta, a Wy mŏcie czas na kafyj. Ci, kerzi niy majōm robota, muszōm bez aby 10 minut wyrŏbiać to ciasto (ugniatać, miyszać, ściskać), a jak już widzicie, że napoczynŏ Wōm odchodzić ôd palcōw, to mogecie sie zrobić chwila pauzy, przikryć ciasto jakōm uciyraczkōm¹² i niech aby bez 30-45 minut wyrŏstŏ we jakim ciepłym miejscu. Idzie tyż wrajzić je do bratruły, kero trocha pryndzyj łozgrzejecie (50 stopni i potyn już wyłōnczcie).

Tera sie biercie za syr i posypka.

Przepresujcie syr, dociepcie do niego żōłtka, masło i wyrōbcie na gładkŏ masa. Biōłka ubijcie na sztywnŏ piana ze cukrym. Niyskorzyj pomiyszejcie jedne ze drugim i dociepcie do tego rodzynki. I fertich.

Posypka. Wciepcie do miski składniki posypki i wyrōbcie na jednolitŏ masa… narychtowanie posypki je ajnfachowe, jak budowa cepa 😉 Jak bajecie chcieli mieć dwie farby tyj posypki, to podzielcie jōm na poła i do jednyj połowy dociepcie kakao i jeszcze trocha pougniatejcie.

Terŏzki idymy do finału. Blacha wyłōżcie papiōrym do pieczyniŏ i wyciepcie na to ciasto drożdżowe. I terŏzki dejcie pozōr! Rynka tōnknijcie¹³ sie we łozpuszczōnym maśle i takōm tustōm łozprowodzejcie ciato po blasze- niy bydzie Wōm sie nic a nic kleić do rynkōw. Na kōniec podziubejcie je widołkōm, to bydzie fajniyj rosło (im wiyncyj tych dziurōw porobicie, tym baje lepi).

Na drożdzowe przidzie warstwa syra.

A na sōm kōniec posypka. Miyndzy dwa palce biercie ciynki kōnsek posypki i ukłŏdejcie na blacha.

Jak już cały kołŏcz bydzie fertich¹⁴, to go na godzina wrojście do bratruły. Wrojście do zimnyj i niech ôna sie łozgrzeje do 180 stopni, to drożdże bydōm jeszcze miały szansa trocha porobić 😉

Kołŏcz baje fertich jak posypka bydzie na złoto przibrōnŏłcōnŏ… może być tak, że we Waszyj bratrule bydzie musioł siedzieć abo 5 minut krōcyj, abo 10 minut wiyncyj… musicie dŏwać pozōr.

Kebyjście chcieli, to na sōm kōniec, jak już kołŏcz bydzie upieczōny, to mogecie go po wiyrchu posuć¹⁵ trocha pudecukrym. Smaczego 🙂