Zakwas ze ćwikli do szłepanio (Zakwas buraczany do picia)

Tak sie terołzki¹ myśla, czy te ślōnske praōłmy² tyż robiōły taki zakwas- abo yno te ze Polski. Na zicher ³je w tym kans⁴ dobroci i niy werci⁵ sie go robić yno na Gody⁶ i potyn jeszcze niyftorzi go uwarzōm i wszyjske probiotyki pódōm⁷ weg⁸. Joł⁹ żech go znołd¹⁰ we taki jednyj staryj ksiōnżce ze receptami¹¹, kero już moł 100 lołt. I tam je zakwas yno ze burakōw i wody. Myślołech sie, że to niy bydzie za dobre bez prziprawōw, ale musza Wōm pedzieć¹², że tyn zakwas je idealny. Bez soli- zdrowszy, smakōw moł połno, fajnie kwajśny, przi hicu¹³ idealny i do tego je taki leko musujōncy… Jak sie nalejecie tego do keliszka na wino, to bajecie¹⁴ mieli trunek choby nojlepszy rocznik.

Co potrza?

2 kg ćwikli (burakōw czerwōnych)

2 litry wody

łeżka zakwasu abo wody ze łogōrkōw, abo krōmka chleba na zakwasie

Ôbiercie te ćwikle, pokrejcie i wciście do jaki srogi¹⁵ krauzy¹⁶ abo bōncloka¹⁷. Zalyjcie wodōm (joł żech doł normalno z kranu, bez warzynia) i dejcie¹⁸ tam łeżka zakwasu na chlyb (nojlepi, keby to bōła yno tako sama woda, kero sie niyrołz zbiyro na zakwasie) abo łeżka zakwasu ze kiszōnych ćwikli, jak żejście tako robiyli, abo woda ze ôgōrkōw kiszōnych… cojś, co by pomōgło napocznōńć kiszynie. Moge to tyż być krōmka chleba, ale dejcie jōm na wiyrch i na drugi dziyń wyciepcie.

Przikryjcie to jakōm szmatkōm i ôdstołwcie w jake ciepłe miejsce. I to się tak musi kisić 5-7 dni. Jak na wiyrchu bydzie sie robiōła piana, to jōm zbiyrejcie.

Jak już bydzie fajnie ukiszōne ( mogecie sie tego sprōbować), to przecedźcie to wszyjsko. Jak mołcie wyciskarka, to mogecie jeszcze wycisnōńć sok ze tych ćwikli, wymiyszejcie go z tym zlōnym, przelyjcie do flaszkōw i dejcie do lodōwki. Tam sie to moge postołć połra¹⁹ tydni, a Wy dziynnie mogecie sie szluknōńć²⁰ pó szklōnki… Na zdrowie 🙂