Blumkołl i krowa (Danie inspirowane kuchnią turecką)




Blumkołl1 i krowa to brzmi choby miano2 ôd jaki bojki3, ale sam to by trza pedzieć4, że ta krowa tak sie zapatrzōła na gornek ze blumkołlym, że do niego wleciała. Tyn miszōng je inspirowany kuchniōm tureckōm- niyrołz moje byzuchy5 sie wynołkwiōm6, jaki kraj, ze ftorego mōm co uwarzić, a joł sie potyn musza trołpić7 i wymyślać. Te wynołkwianie bōło richtich8 dobre.

Co potrza?

0,5 kg pomelanyj9 wołowiny

1 niy za srogi10 blumkołl

1 srogo cebula

1 czerwōno papryka

3 łeżki kōncyntratu ze tōmatōw11

sōl i pieprz

trocha oliwy

tak ze 2 szklōnki wrzōntku

Na patelni prziypiyczcie wołowe miyso- mogecie na nia kapnōńć ździebko12 oliwy. Pokrōno cebula i papryka przipiyczcie leko na oliwie we jakim wiynkszym gorku. Niyskorzi dociepcie do tego miyso, pokrōny blumkołl, kōncyntrat, prziprawy i chwila wszyjsko posmażcie. Zalyjcie to potyn wrzōncōm wodōm i niech sie to przikryte warzi tak dugo, aże blumkołl bydzie miynki. Terozki już yno trza pedzieć: smacznego 🙂

1kalafior

2nazwa

3bajki

4powiedzieć

5goście

6wymyślą

7męczyć

8naprawdę

9mielonej

10duży

11pomidorów

12trochę




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*