Chlyb na dōmowych drożdżach

Jak narychtować¹ dōmowe drożdże, znojdziecie sam: https://chopwkuchni.pl/?p=1529 A jak sie już je moł fertich², to nojlepi upiyc chlyb.

Co potrza?

4 szklōnki mōnki pszynnyj (nojlepi 750, ale jak niy bajecie³ umieli taki znojś we sklepie, to moge być i 500 abo 550)

2 szklōnki mōnki pszynnyj razowyj (szklōnka moł tak ze 120 g)

porcja dōmowych drożdżōw

2 łeżeczki soli

2 szklōnki wody

łeżeczka cukru

Nojprzōd do miski idzie szklōnka wody, szklōnka mōnki pszynnyj, krauza⁴ drożdżōw i łeżeczka cukru. Dobrze to łozmiyszejcie i odłōżcie w jake ciepłe miejsce. Joł zawsze sie łozgrzeja⁵ bratruła⁶ na 50 stopni, wyłōncza jōm i wrażōm⁷ tam miska ze zaczynym. Przi takich drożdżach te ciasto potrzebuje ździebko⁸ wiyncyj czasu, joł żech to ôdstawiōł na 2 godziny- te wszyjske bakterie muszōm mieć czas na prokreacja 😉

Potyn do tego przidōm 3 szklōnki mōnki pszynnyj, 2 razowyj, sōl i szklōnka wody. Fajnie to wyrōbcie i przełōżcie do naczynia żaroodpornego, kere nojlepi wyłożyć papiōrym do pieczynioł. Przikryć i ôdłożyć do ciepłego miejsca na 2 godziny. Choć tak po prołwdzie mogecie sie to tyż dać do kyksōwki i bez przikrycia potyn wrajzić do tyj leko nagrzōnyj bratruły.

Na kōniec ôstało nōm pieczynie. Bratruła łozgrzyjcie na 230 stopni i wrojście tam nasz chlyb na 10 minut. Potyn zmniyjszcie na 200 stopni na nastympne 10 minut. Niyskorzi 40 minut niech sie ôn piecze na 180 stopni. Jak baje upieczōny, to go wyciōngcie⁹, dejcie¹⁰ na kratka, żeby sie ochōdziōł i za pó godziny mogecie sie za niego brać. Smacznego 🙂