Gańś ze apfylzinōm (Gęś z pomarańczą)

Na świyntego Marcina pōnoś musi być gańś abo gyńś- te biołe gyngajōnce stwory majōm na Ślōnsku roztomajte^¹ miana.^² Jak żech bōł mały, to my chowali^³ gańsi, bo to trza bōło chopcōm piyrza na pierziny naszykować, a że we sklepach bōło pusto, a tako gańś wymagań srogich niy mo, to i sie łone^⁴ kole chałpy łajzioły.^⁵ Niystety jedyn stary gōńsior mie rołz tak pogōniōł^⁶ i poszczypoł po purzitkach,^⁷ że do dzisiej spokojnie kole gańsi przelyjś niy umia. Chyba, że już bez piyrza siedzi we lodōwce, to tako sie nawet lubia przikludzić⁸ do dom, a potyn jōm fajnie ogrzołć we jaki brytfance abo piekarniku 😉

Co potrza?

1 pierś ze gańsi

sok ze 2 apfylzinōw

2 suszōne figi

keliszek różowego wina (abo biołego)

ździebko^⁹ gałki muszkatałowyj

sōl i pieprz

Jo sie z tōm gańsiōm niy smolōł,^¹⁰ żech jōm wciep do brytfanki ze tym sokym, winym, suszōnymi figami, gałkōm, pieprzym (soli dołech^¹¹ trocha późni) i żech jōm tam dusioł 45 min. Kebyście mieli czas, to mogecie ze tych wszyskich składników zrobić marynata i te miyso^¹² w ni trzimać bez noc, żeby sie fajnie przegryzło.

Jak już sie te miyso podusiōło (jak byjście je dusiyli wiyncyj niż godzina, to by bōło jeszcze lepi, ale joł^¹³ żech już bōł taki godny^¹⁴, że żech dużyj^¹⁵ niy mōg^¹⁶ szczimać^¹⁷ 😉 ), to je we odkrytyj brytfance wrołźcie^¹⁸ na pó^¹⁹ godziny do nagrzōnego na 200 stopni piekarnika. Potyn wyciōngcie miyso ze brytfanki, a do zōłzy^²⁰ dodejcie trocha mōnki i mogecie jōm tyż zblyndować, żeby sie te figi fajnie złōnaczōły.^²¹ Podgrzyjcie ta zōłza jeszcze trocha, żeby zgynstniała i biercie sie za jedzynie. Do taki gańsi to pasujōm i kloski, i kartołfle, i frytki… nie ma co dużyj pisać: smacznego 🙂