Galert świńsko-drobiowy (Galareta)

Ostatnio robiōłech¹ golōnka we piwie, a że szkoda mi bōło² tego wywaru, co to jeszcze- jak żech go wrajziōł³ do lodōwki- tak sie fajnie zsiednōł, że nic, yno trza bōło ś niego zrobić galert. Golōnki bōły już zezarte⁴, a jakeś miyso trza by bōło dać rajn⁵. A jak żech sie swoji Baby⁶ zapytoł, czy chce tam mieć świnia czy kura, to padło na kura i tak żech prziszoł na galert świńsko-drobiowy 🙂

Podstawōm do niego je recept na golōnka: http://chopwkuchni.pl/?p=728 , a jak już mołcie je fertich⁷, to sie bierymy dali za robota.

 

Co potrza?

500 g kurczaka- joł doł filety ze podudzi

2 markwie⁸

gorść zielōnego mrożōnego groszku

jedne uwarzōne jajco

 

Tyn wywar po golōnkach nojlepi nojprzōd⁹ przecedzić. Potyn wciepcie tam miyso ze kurczaka, marchew, groszek i warzcie¹⁰, aż marchew bydzie miynkoł¹¹. Tera pokrejcie¹² miyso i marchew, ôbiercie i pokrejcie jajco. Niyskorzi¹³ fajnie sie to wszysko poukłołdejcie we jaki misce abo azjetkach¹⁴, zalyjcie wywarym i dejcie¹⁵ do lodōwki. Jak stwardnie, to sie mogecie brać za jedzynie. Tyn galert niy bydzie aż tak twardy, żebyjście go mōgli krajać nożym, a jakbyjście aż taki chcieli mieć, to musicie tam tyż jeszcze ôzpuścić¹⁶ łeżeczka żelatyny. Joł robiōł bez i bōło richtich¹⁷ dobre. Smacznego 🙂