Citromisu (Eksperymentalne podejście do zagadnienia zwanego tiramisu)

Połōnczynie citrōłny1 i bazylii je tak dobre, że już ôd2 dugszego czasu nosiōło mie, żeby wykorzystać je do jakego deseru. Ôstatnio bōło u mie na tapecie tiramisu i jak żech je jołd, to mie oświyciōło… 😉

Co potrza?

4 jajca (4 żōłtka i 2 białka)

poła szklōnki cukru

500 g mascarpōne

200 g podłużnych biszkoptōw (jeden mańszy pakyt)

2 citrōłny

gorść3 liści bazylii

2-3 łeżki limoncello abo cytrynōwki (abo kōniaku)

poła szklōnki czornego mocnego tyju4– jo go narychtowoł ze 2 torebek

Ôberznijcie5 skōra ze citrōłny, ale dejcie pozōr6, żeby to bōło yno te żōłte (joł żech ôbiyraczkōm ściōngoł rube pasy wzdłuż, a potyn żech na desce je ciōł na take blank7 ciynke jak nudle8). Wrojście9 do gorka, nasujcie10 tam 2 łeżki cukru, nalyjcie trocha wody i niech sie to tak aby ze 10 minut pomału11 powarzi. Sok ze jednyj citrōłny zmiksujcie ze bazyliōm. Ubijcie biōłka- dejcie12 dō nich poła cukru, a potyn na parze ubijcie żōłtka ze resztōm cukru (na parze, keby13 fto niy wiedziōł, to bydzie we misce nad gorkym ze warzōncōm14 sie wodōm). Jak już te żōłtka bydōm fajnie ubite- tak ze połra minut im dejcie–to wmiyszejcie tam citrōłna ze bazyliōm, sznapsa15 i mascarpōne. A na sōm16 kōniec poleku17 dodejcie tam biōłka.

Narychtujcie tego mocnego tyju i wyciście do niego drugoł citrōłna i wlyjcie wywar ze skōrek, tōnknijcie18 w tym miszōngu19 biszkopta i przełōżcie do formy (nojlepi taki prostokōntnyj żaroodpornyj). Jak już cały spodek bydzie połny biszkoptōw, to wyłōżcie na nie poła masy ze mascarpōne. Tera zajś20przidōm21 biszkopty tōnkane22 we tyju i na nie reszta masy. Po wiyrchu ôstało23 nōm już yno pociepać24 fajnie te uwarzōne skōrki ze citrōłny. Dejcie to na połra godzin abo całoł noc do lodōwki i… smacznego 🙂

1cytryny

2ô=ło

3garść

4herbaty

5obetnijcie

6uważajcie

7całkiem

8makaron

9włóżcie

10nasypcie

11powoli

12dajcie

13gdyby

14gotującą

15alkohol

16sam

17powoli

18zamoczcie

19mieszance

20znów

21przyjdą

22moczone

23zostało

24powrzucać

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*