Nolywka ze czerwōnych jagōdkōw (Nalewka z czerwonej porzeczki)




Nojprzōd robiōłech yno ze czornych i jak fto1 jeszcze taki niy rychtowoł2, to musi to wartko3 nadrobić, bo tyn smak je niy do ôpedzynia4. Potyn żech bōł ciekawy, co to wyńdzie5 ze czerwōnych jagōdkōw. I muszą Wōm pedzieć6, że to tyż je niebo we gymbie: słodke, ale fajnie przełōmane tōm kwaskowatościōm. Bydzie sie czym ôzgrzywać7 we zima

Co potrza?

2 kg czerwōnych jagōdkōw

0,5 litra szpyrytusu

0,5 l gorzołki8

1- 2 szklōnki cukru

Umyte i ôbrane jagōdki wciepcie9 do srogi10 krauzy11, zalyjcie gorzołkōm i szpyrytusym i zapōmnijcie ô nich. Jak Wōm sie spōmni12 – te połra tydni niyskorzi13– to ślyjcie14 gorzołka do jaki flaszki, a jagōdki po wiyrchu15 posujcie16 cukrym (tak na oko pó szklōnki). Jak puszczōm sok, to ślyjcie go do flaszki i zajś posujcie cukrym. I tak sie mogecie pobawić połra razy, a jak już bajecie widzieć, że tego soku je małowiela17, to we jakim garcu pomiyszejcie to wszyjsko, co żejście ślywali z tyj krauzy do flaszkōw. Mogecie to przecedzić i wymiyszane wlołć nazod do flaszkōw i tera zajś niech sie to trocha przegryzie. Tak żech to robiōł pryndzyj, ale w zeszłym roku moja kobiyta dostała na gyburtstag18 wyciskarka do owocōw i to sie richtich przidołwo przi nolywkach. Cukrym żech to zasuł yno 2 razy, a potyn żech te owoce przepuściōł bez ta wyciskarka. Wyszła z tego tako gynsto breja, kero żech wrajziōł19 do krauzy i kero je idealno do przekłołdania ciasta abo tortōw. A żeby sie nic niy zmarnowało, to żech jeszcze uwarzōł kōmpot ze to, co bōło wyciśniynte i jeszcze miołech trocha jagōdkowego wina 😉 Jak dołcie mani cukru, to ta nolywka bydzie barzi wytrawno i żołdyn chop Wōm niy powiy, że to yno liker dlo babōw 😉 Smacznego 🙂

1ktoś

2przygotowywał

3szybko

4opowiedzenia

5wyjdzie

6powiedzieć

7rozgrzewać

8wódki

9wrzućcie

10dużej

11słoika

12przypomni

13później

14zlejcie

15na górze

16posypcie

17mało

18urodziny

19włożyłem




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*