To trocha taki barzi1 gynsty ajntopf, ale tyla sam je dobroci, że i dwa dni za kupōm2 idzie sie tego pojejś. Niy ma co sie łozpisywać3, bierymy sie do roboty.
Co potrza?
1-2 polyndwiczki wieprzowe
2 małe cukinie
1 srogi boryj4
2 zōmbki czosku
25 dkg brōnołtnych5 pieczarkōw (sōm barzi arōmatyczne)
ze 2-3 łeżki oliwy
kapka oleju
1 łeżka masła
2 łeżeczki zielōnyj czubrycy
pó łeżeczki tymianku
pó łeżeczki wyndzōnyj papryki
sōl i pieprz
Pokrejcie6 polyndwiczki na cyntymetrowe szajbki7 i podpiyczcie na patelni- dejcie tam yno kapka oleju. We gorku na oliwie i maśle podpiyczcie czosnek, dociepcie do tego pokrōno cukinia, boryj, pokrōne na pó pieczarki. Jak już polyndwiczki bydōm fajnie przibrōnołcōne, to tyż je wrojście do gorka, a na patelnia wlyjcie trocha wody, żeby zebrała te podpieczōne miyso, kere sie prziklejōło do patelni- szkoda tego arōmatu. Kebyjście akurat mieli ôtwartoł flaszka biołego wina, to mogecie zamiast wody włołć trocha na ta patelnia.
Dociepcie do gorka prziprawy, ale bez soli, bo pōnojś przi polyndwiczkach lepi jōm dać na kōńcu- miso bydzie fajnie miynke.
Jak już wszyjske warzywa bydōm uwarzōne, to dosmakujcie to jeszcze trocha i biercie sie za jedzynie. Smacznego 🙂
1bardziej
2z rzędu; ō- samogłoska w wymowie między o i u
3rozpisywać
4por
5brązowych
6pokrójcie
7plasterki
To może być pieronym dobre.