Bresaula- gibkŏ forszpajza ze Italiji (Szybka przystawka z Włoch)

Uwielbiōm szinki ze Italiji¹, ale jakosik ta bresaula² bōła dlō mie ździebko³ za intynsywnŏ we smaku- do czasu, jak żech trefiōł jedna Italijŏczka⁴ i ta mi dopiyro wyklarowała⁵, jako jōm trza jejś. Szło by pedzieć, że to take carpaccio, yno ze dojrzałego miysa, ale tyn smak… aże mi żołōndek sie śmieje 😉

Co potrza?

bresaula- wszyjsko załeży ôd tego, wiela ludzi bydzie siedzieć przi stole, ale na jedna forszpajza, to by tak trza aby 5 szajbōw⁶ na osoba

rucola- poła gorści na talyrzyk

oliwa

sok ze citrōłny⁷

parmezan- nojlepi we szajbach abo taki, kery sami zetrzecie

ździebko soli i korzyni (pieprzu)

Na talyrzik przidzie rucola, potyn bresaula, polyjcie jōm oliwōm, sokym, dejcie trocha soli, korzyni i na sōm wiyrch parmezan… Wasz bezuch⁸ bydzie na zicher⁹ zadowolōny 😉 Smacznego 🙂

1Włoch

2dojrzewająca polędwica wołowa

3trochę

4Włoszkę

5wytłumaczyła

6plastrów

7cytryny

8goście

9na pewno